کیف: یوکرین کے دارالحکومت کیف پر روس نے رات گئے بیلسٹک میزائل حملہ کیا، جس کے نتیجے میں کم از کم 9 افراد ہلاک جبکہ 4 بچوں سمیت 27 افراد زخمی ہو گئے۔
یوکرین کی ریاستی ایمرجنسی سروس کے مطابق روسی حملوں نے کیف کے پانچ مختلف اضلاع کو نشانہ بنایا، جہاں رہائشی عمارتوں، گاڑیوں اور دیگر شہری تنصیبات کو نقصان پہنچا۔
حملوں سے قبل کیف کے میئر وٹالی کلیٹسکو نے ٹیلی گرام پر شہریوں کو خبردار کرتے ہوئے کہا کہ دارالحکومت بیلسٹک میزائل حملے کی زد میں ہے، لہٰذا تمام شہری فوری طور پر محفوظ پناہ گاہوں میں منتقل ہو جائیں۔
عینی شاہدین کے مطابق حملوں کے دوران شہر میں مسلسل دس سے زائد دھماکوں کی آوازیں سنائی دیں، جبکہ دھماکوں کی شدت سے متعدد علاقوں میں گاڑیوں کے الارم بج اٹھے۔
حکام کے مطابق ڈارنیٹسکی ضلع سب سے زیادہ متاثر ہوا، جہاں حملوں میں 7 افراد جان کی بازی ہار گئے جبکہ 14 افراد زخمی ہوئے۔ متعدد رہائشی عمارتوں اور گاڑیوں کو بھی نقصان پہنچا۔
اسی طرح سولومینسکی ضلع میں روسی حملے کے نتیجے میں 2 افراد ہلاک اور 8 زخمی ہوئے۔ اس علاقے میں ایک پانچ منزلہ رہائشی عمارت کو بھی شدید نقصان پہنچا۔
حالیہ مہینوں میں روس اور یوکرین کے درمیان حملوں میں نمایاں اضافہ دیکھا گیا ہے۔ روس نے یوکرین کے مختلف شہروں پر طویل فاصلے تک مار کرنے والے میزائل اور ڈرون حملوں میں شدت پیدا کی ہے، جبکہ یوکرین بھی روسی اہداف پر حملے جاری رکھے ہوئے ہے۔
اقوام متحدہ کے مطابق جون 2026 اپریل 2022 کے بعد یوکرین میں شہری ہلاکتوں کے اعتبار سے سب سے مہلک مہینہ ثابت ہوا، جس کے باعث بین الاقوامی برادری نے شہریوں کے تحفظ پر ایک بار پھر تشویش کا اظہار کیا ہے۔
