لاہور: پاکستان کرکٹ بورڈ (پی سی بی) نے اپنے بڑے ڈومیسٹک ون ڈے ٹورنامنٹ کو دوبارہ "چیمپئنز کپ” کے نام سے متعارف کرانے کا اعلان کر دیا ہے۔ یہ ایونٹ 11 سے 18 اگست تک ملتان کرکٹ اسٹیڈیم میں کھیلا جائے گا اور اسے 2027 آئی سی سی کرکٹ ورلڈ کپ کی تیاریوں کا اہم مرحلہ قرار دیا جا رہا ہے۔
ٹورنامنٹ میں پاکستان گولڈ، پاکستان گرینز، پاکستان وائٹس اور پاکستان بلیوز کے نام سے چار ٹیمیں حصہ لیں گی۔ تمام ٹیمیں سنگل راؤنڈ رابن مرحلے میں ایک دوسرے کے مدمقابل آئیں گی، جس کے بعد ٹاپ دو ٹیموں کے درمیان فائنل کھیلا جائے گا۔ ایونٹ میں مجموعی طور پر سات ون ڈے میچز شیڈول ہیں۔
چاروں ٹیموں کی قیادت بالترتیب شاہین شاہ آفریدی، شاداب خان، صائم ایوب اور صاحبزادہ فرحان کریں گے، جبکہ اسکواڈز میں متعدد ایسے کھلاڑی شامل ہیں جو قومی وائٹ بال ٹیم کی نمائندگی کر چکے ہیں۔
البتہ انگلینڈ کے خلاف ٹیسٹ سیریز کی تیاریوں میں مصروف ریڈ بال اسکواڈ کے کھلاڑی اور دی ہنڈریڈ میں شرکت کرنے والے اسپنر ابرار احمد اس ٹورنامنٹ کا حصہ نہیں ہوں گے۔
پی سی بی کے ڈائریکٹر ہائی پرفارمنس عاقب جاوید کا کہنا ہے کہ چیمپئنز کپ کے انعقاد کا مقصد قومی کھلاڑیوں کو زیادہ سے زیادہ 50 اوورز کے مقابلے فراہم کرنا ہے تاکہ 2027 آئی سی سی کرکٹ ورلڈ کپ کی تیاری مؤثر انداز میں کی جا سکے۔
واضح رہے کہ 2024 میں چیمپئنز کپ کو پاکستان کے ڈومیسٹک کرکٹ سیزن کا سب سے بڑا ایونٹ قرار دیا گیا تھا، تاہم گزشتہ سال یہ مقابلے اسی برانڈنگ کے تحت منعقد نہیں کیے گئے تھے۔ اب پی سی بی نے ایک مرتبہ پھر اس ٹورنامنٹ کو چیمپئنز کپ کے نام سے بحال کر دیا ہے۔
