لندن: فلسطینی صحافیوں کی سنڈیکیٹ (PJS) نے کہا ہے کہ 2026 کی پہلی ششماہی کے دوران مقبوضہ مغربی کنارے اور غزہ کی پٹی میں میڈیا کارکنوں کے خلاف 467 خلاف ورزیاں ریکارڈ کی گئیں، جبکہ اس عرصے میں 8 فلسطینی صحافی اپنی جانوں سے ہاتھ دھو بیٹھے۔
راملہ میں پریس کانفرنس کے دوران پیش کی گئی رپورٹ میں سنڈیکیٹ نے الزام عائد کیا کہ اسرائیلی فورسز اور اسرائیلی آباد کار صحافیوں اور آزادیٔ صحافت کے خلاف منظم مہم چلا رہے ہیں۔
سنڈیکیٹ کی فریڈمز کمیٹی کے سربراہ محمد الاحم نے کہا کہ یہ واقعات مقبوضہ فلسطینی علاقوں میں میڈیا کی سرگرمیوں کو محدود کرنے اور حقائق کی آزادانہ ترسیل روکنے کی ایک منظم پالیسی کا حصہ ہیں۔ ان کے مطابق صحافیوں کو نشانہ بنانا انفرادی واقعات نہیں بلکہ معلومات تک رسائی اور سچائی کی فراہمی پر حملہ ہے۔
رپورٹ کے مطابق مجموعی خلاف ورزیوں میں سے 41 فیصد سے زائد واقعات صحافیوں کی کوریج روکنے یا انہیں حراست میں لینے سے متعلق تھے، جبکہ 192 واقعات کو براہِ راست میڈیا کے کام میں رکاوٹ ڈالنے کی کوشش قرار دیا گیا۔
سنڈیکیٹ کے مطابق اکتوبر 2023 سے اب تک جاں بحق ہونے والے فلسطینی صحافیوں کی تعداد 264 ہو چکی ہے۔
رپورٹ میں مزید بتایا گیا کہ رواں سال کی پہلی ششماہی کے دوران 27 صحافیوں کو گرفتار کیا گیا، 29 مواقع پر لائیو فائر کیا گیا، 78 مرتبہ آنسو گیس یا سٹن گرینیڈ استعمال کیے گئے، 14 جسمانی حملے ریکارڈ ہوئے، 2 صحافی گولی لگنے سے زخمی ہوئے، 16 مسلح دھمکیوں کے واقعات پیش آئے، جبکہ اسرائیلی آباد کاروں کی جانب سے مبینہ طور پر 6 حملے کیے گئے۔
سنڈیکیٹ کا کہنا ہے کہ اسرائیلی حکام نے 19 صحافیوں کو مقبوضہ مشرقی یروشلم میں مسجد اقصیٰ کے احاطے میں داخل ہونے سے روکا، جبکہ میڈیا آلات ضبط کرنے یا نقصان پہنچانے کے 22 واقعات بھی ریکارڈ کیے گئے۔
رپورٹ کے مطابق متعلقہ عرصے کے دوران اسرائیلی فورسز نے 7 گھروں اور میڈیا اداروں پر چھاپے مارے، 3 میڈیا ادارے بند کیے اور 5 ویب سائٹس تک رسائی معطل کر دی۔
اعداد و شمار کے مطابق فروری میں سب سے زیادہ 122 خلاف ورزیاں ریکارڈ کی گئیں، جبکہ جنوری میں 109 اور جون میں 89 واقعات رپورٹ ہوئے۔
سنڈیکیٹ نے مزید کہا کہ اکتوبر 2023 سے اب تک فلسطینی صحافیوں کے خلاف مجموعی طور پر 4,127 خلاف ورزیوں کو دستاویزی شکل دی گئی ہے، جن میں 193 گرفتاریاں، 187 میڈیا اداروں کی تباہی اور 140 صحافیوں کے گھروں کو نقصان پہنچانے کے واقعات شامل ہیں۔ رپورٹ کے مطابق اسی مدت کے دوران صحافیوں کے 713 رشتہ دار بھی ہلاک ہوئے۔
فلسطینی صحافیوں کی سنڈیکیٹ کے سربراہ ناصر ابوبکر نے کہا کہ تنظیم بین الاقوامی اداروں کے سامنے قانونی کارروائی جاری رکھے ہوئے ہے اور انٹرنیشنل فیڈریشن آف جرنلسٹس (IFJ) کے تحت جنیوا میں اقوام متحدہ کی کانفرنس میں شواہد بھی پیش کیے جا چکے ہیں۔ انہوں نے بتایا کہ فرانس کی قومی صحافیوں کی یونین بھی صحافیوں کے خلاف مبینہ جنگی جرائم کے حوالے سے فرانسیسی عدالتوں میں مقدمہ دائر کرنے کی تیاری کر رہی ہے۔
ناصر ابوبکر نے بین الاقوامی فوجداری عدالت (ICC) سے مطالبہ کیا کہ فلسطینی صحافیوں کے خلاف مبینہ جرائم کی تحقیقات میں تیزی لائی جائے اور ذمہ دار افراد کے خلاف کی جانے والی کارروائی کو منظرعام پر لایا جائے۔
دوسری جانب اسرائیلی حکومت اور اسرائیلی دفاعی افواج متعدد بار اس بات کی تردید کر چکی ہیں کہ صحافیوں کو جان بوجھ کر نشانہ بنایا جاتا ہے۔ اسرائیلی حکام کا مؤقف ہے کہ فوج صرف جائز عسکری اہداف کے خلاف کارروائیاں کرتی ہے اور بعض میڈیا کارکن مسلح گروپوں سے وابستگی کے باعث ہلاک ہوئے۔
