تہران: ایران کی پاسدارانِ انقلاب (IRGC) نے برطانیہ کو سخت انتباہ دیتے ہوئے کہا ہے کہ اگر برطانیہ نے ایران کے خلاف امریکی یا اسرائیلی فوجی کارروائیوں میں معاونت جاری رکھی تو ایران کے خلاف استعمال ہونے والا کوئی بھی فوجی اڈہ جائز ہدف تصور کیا جائے گا۔
ایرانی میڈیا کے مطابق پاسدارانِ انقلاب نے اپنے بیان میں الزام عائد کیا کہ برطانیہ نے ایران پر حالیہ امریکی اور اسرائیلی حملوں میں اہم کردار ادا کیا ہے۔ بیان میں کہا گیا کہ برطانوی حکومت خطے میں عدم استحکام کی ذمہ دار رہی ہے اور اسے مزید ایسے اقدامات سے گریز کرنا چاہیے۔
پاسدارانِ انقلاب نے دعویٰ کیا کہ امریکی بحریہ نے بحرِ ہند میں موجود اپنے جنگی جہازوں سے کروز میزائل داغنے کے بعد ان کا ذخیرہ بڑی حد تک استعمال کر لیا ہے، جس کے باعث امریکا اب برطانیہ کے رائل ایئر فورس فیئرفورڈ (RAF Fairford) اڈے سے B-1 بمبار طیاروں کے ذریعے کارروائیاں کر رہا ہے۔
بیان میں کہا گیا کہ ایران کی وزارتِ خارجہ پہلے ہی واضح کر چکی ہے کہ ایرانی سرزمین کے خلاف استعمال ہونے والا کوئی بھی فوجی اڈہ ایران کے لیے ایک جائز فوجی ہدف ہوگا۔
پاسدارانِ انقلاب نے اپنے بیان میں برطانیہ پر تاریخی طور پر مشرقِ وسطیٰ میں مداخلت، اسلامی ممالک میں تقسیم، آمرانہ حکومتوں کی حمایت اور فلسطین کے مسئلے میں کردار ادا کرنے جیسے الزامات بھی عائد کیے۔
یہ بیان ایسے وقت میں سامنے آیا ہے جب ایران اور امریکا کے درمیان کشیدگی عروج پر ہے اور دونوں ممالک ایک دوسرے کے مفادات اور تنصیبات کو نشانہ بنانے کے الزامات عائد کر رہے ہیں۔
دوسری جانب برطانیہ حال ہی میں نئے قومی سلامتی قوانین کے تحت پاسدارانِ انقلاب کو قومی سلامتی کے لیے خطرہ قرار دے چکا ہے، جبکہ ایران نے اس فیصلے کو اشتعال انگیز قرار دیتے ہوئے جوابی اقدامات کا عندیہ دیا ہے۔
