اسلام آباد: آل پاکستان پیٹرول پمپ اونرز ایسوسی ایشن نے پیٹرولیم مصنوعات کی قیمتوں کے یومیہ تعین کے معاملے پر حکومت سے مذاکرات ناکام ہونے کے بعد ملک گیر غیر معینہ مدت کی ہڑتال کا اعلان کر دیا ہے۔
ایسوسی ایشن کے رہنما نعمان بٹ نے اپنے ویڈیو پیغام میں کہا کہ وفاقی وزیرِ پیٹرولیم کے ساتھ ہونے والے مذاکرات کسی مثبت نتیجے پر نہیں پہنچ سکے۔ ان کے مطابق پیٹرول پمپ مالکان کے منافع (مارجن) اور پیٹرولیم مصنوعات کی یومیہ قیمتوں کے نفاذ سے متعلق معاملات پر اتفاق رائے نہ ہو سکا۔
انہوں نے بتایا کہ مذاکرات کی ناکامی کے بعد فیصلہ کیا گیا ہے کہ 22 جولائی کی رات 12 بجے سے ملک بھر کے تمام پیٹرول پمپ غیر معینہ مدت کے لیے بند رکھے جائیں گے۔
نعمان بٹ نے کہا کہ جب تک حکومت ایسوسی ایشن کے مطالبات تسلیم نہیں کرتی، ہڑتال جاری رہے گی۔ انہوں نے ملک بھر کے تمام پیٹرول پمپ مالکان سے اپیل کی کہ وہ ہڑتال میں بھرپور شرکت کریں اور مقررہ وقت سے اپنے پمپ مکمل طور پر بند رکھیں۔
پیٹرول پمپ مالکان کی جانب سے ہڑتال کے اعلان کے بعد خدشہ ظاہر کیا جا رہا ہے کہ اگر مذاکرات میں فوری پیش رفت نہ ہوئی تو ملک کے مختلف شہروں میں پیٹرول اور ڈیزل کی فراہمی متاثر ہو سکتی ہے، جس سے شہریوں اور ٹرانسپورٹ کے شعبے کو مشکلات کا سامنا کرنا پڑ سکتا ہے۔
