نئی دہلی: بھارت کی اپوزیشن جماعت کانگریس کے سینئر رہنما راہول گاندھی نے وزیراعظم نریندر مودی کی حکومت پر شدید تنقید کرتے ہوئے کہا ہے کہ بھارتی تاریخ میں نوجوانوں کا اگر کوئی بدترین دشمن وزیراعظم رہا ہے تو وہ نریندر مودی ہیں۔
اپنے بیان میں راہول گاندھی نے کہا کہ مودی حکومت کے دور میں کروڑوں طلبہ کا مستقبل متاثر ہوا، لیکن امتحانی نظام میں بدعنوانی کے ذمہ دار عناصر کے خلاف مؤثر کارروائی نہیں کی گئی۔
انہوں نے دعویٰ کیا کہ ملک بھر میں 152 امتحانی پرچے لیک ہوئے، تاہم ان واقعات میں ملوث کسی بھی ذمہ دار شخص کو سزا نہیں دی گئی۔
کانگریس رہنما کا کہنا تھا کہ سزا اگر کسی کو ملی ہے تو وہ محنت کرنے والے نوجوان ہیں، جنہیں اپنے حقوق کے لیے آواز اٹھانے اور وزیر تعلیم کے استعفے کا مطالبہ کرنے کی بھی اجازت نہیں دی گئی۔
راہول گاندھی نے الزام عائد کیا کہ احتجاج کرنے والے نوجوانوں پر تشدد کیا گیا، جبکہ امتحانی پرچے لیک کرنے والے عناصر آزادانہ گھوم رہے ہیں۔
انہوں نے کہا کہ نوجوانوں کے مستقبل کا تحفظ حکومت کی ذمہ داری ہے، مگر موجودہ حکومت اس اہم مسئلے پر ناکام ثابت ہوئی ہے، جس کے باعث طلبہ اور ان کے خاندان شدید بے چینی کا شکار ہیں۔
