اسلام آباد: الپائن کلب آف پاکستان کی دوسری ویمنز خسرگنگ مہم کامیابی سے مکمل ہو گئی، جس کے دوران ملک کے مختلف حصوں سے تعلق رکھنے والی آٹھ پاکستانی خواتین کوہ پیماؤں نے 6,040 میٹر بلند خسرگنگ چوٹی سر کر کے پاکستان کی کوہ پیمائی کی تاریخ میں ایک نیا سنگِ میل قائم کر دیا۔
کامیاب ٹیم میں گلگت بلتستان، پنجاب، خیبرپختونخوا، بلوچستان اور اسلام آباد سے تعلق رکھنے والی خواتین شامل تھیں، جنہوں نے سخت موسمی حالات اور دشوار گزار راستوں کا کامیابی سے مقابلہ کرتے ہوئے چوٹی کو سر کیا۔
مہم کی قیادت بی بی افزون نے کی
خسرگنگ مہم کی قیادت معروف کوہ پیما بی بی افزون نے کی، جبکہ ممتاز ہائی آلٹیٹیوڈ گائیڈز علی محمد سادپارہ، صادق حسین سادپارہ اور الیاس ہُشے نے تکنیکی معاونت فراہم کی۔
چوٹی پر روپ فکسنگ کی ذمہ داری قائد شگری نے انجام دی، جس سے ٹیم کو محفوظ انداز میں سمٹ مکمل کرنے میں مدد ملی۔
الپائن کلب نے خواتین کی کامیابی کو تاریخی قرار دے دیا
الپائن کلب آف پاکستان کے سیکریٹری جنرل ایاز شگری نے کامیاب خواتین کوہ پیماؤں کو مبارکباد دیتے ہوئے کہا کہ اس کامیابی نے ثابت کر دیا ہے کہ پاکستانی خواتین ہمت، عزم اور پیشہ ورانہ صلاحیتوں میں کسی سے کم نہیں۔
انہوں نے کہا کہ خسرگنگ چوٹی کی کامیاب مہم ملک میں خواتین کی کوہ پیمائی کے فروغ کے لیے ایک اہم سنگِ میل ثابت ہوگی اور الپائن کلب مستقبل میں بھی خواتین کو قومی اور بین الاقوامی سطح پر اپنی صلاحیتیں منوانے کے مزید مواقع فراہم کرتا رہے گا۔
یہ کامیابی نہ صرف پاکستان میں خواتین کی کوہ پیمائی کے شعبے کے لیے حوصلہ افزا پیش رفت ہے بلکہ نوجوان لڑکیوں کے لیے بھی ایک مثبت مثال ہے کہ وہ بلند اہداف کے حصول کے لیے اعتماد اور عزم کے ساتھ آگے بڑھ سکتی ہیں۔
