امریکی نائب صدر جے ڈی وینس نے ایران کے ساتھ مذاکرات اور مفاہمتی یادداشت کے خلاف چلائی جانے والی مبینہ اسرائیل نواز آن لائن مہم پر سخت تنقید کرتے ہوئے کہا ہے کہ وہ امریکی عوام کے مفاد میں فیصلے کریں گے، نہ کہ کسی غیر ملکی اثر و رسوخ کے تحت۔
قدامت پسند پوڈکاسٹر جو روگن کو دیے گئے ایک انٹرویو میں جے ڈی وینس نے دعویٰ کیا کہ ایک منظم، مالی طور پر مضبوط اور مربوط مہم کے ذریعے ٹرمپ انتظامیہ کی ایران کے ساتھ مذاکراتی کوششوں کو ناکام بنانے کی کوشش کی گئی۔
ان کا کہنا تھا کہ ایک حالیہ رپورٹ میں ان افراد کا ذکر کیا گیا جنہیں مبینہ طور پر سابق ٹرمپ مہم سے وابستہ ایک شخصیت کے ذریعے ادائیگیاں کی گئیں، جبکہ ان رقوم کا تعلق اسرائیلی حکومت کے بعض عناصر سے بتایا گیا۔ وینس کے مطابق یہی افراد انہیں مسلسل اس لیے تنقید کا نشانہ بنا رہے تھے کیونکہ وہ صدر ڈونلڈ ٹرمپ کی ہدایت کے مطابق ایران کے ساتھ مذاکرات آگے بڑھانے کی کوشش کر رہے تھے۔
جے ڈی وینس نے کہا کہ ان کے خلاف سوشل میڈیا پر مہم چلائی گئی، صحافیوں کو معلومات فراہم کی گئیں اور یہ تاثر دینے کی کوشش کی گئی کہ ایران کے ساتھ مذاکرات نہیں ہونے چاہئیں بلکہ فوجی کارروائی غیر معینہ مدت تک جاری رہنی چاہیے۔
انہوں نے مزید کہا کہ ان پر قطر سمیت دیگر غیر ملکی حکومتوں سے متاثر ہونے اور مختلف شخصیات سے ہدایات لینے جیسے الزامات بھی عائد کیے گئے، جنہیں انہوں نے بے بنیاد قرار دیا۔
وینس نے کہا کہ اگر کسی غیر ملکی حکومت کے بعض عناصر کسی معاہدے سے اختلاف رکھتے ہیں تو وہ اپنی رائے دے سکتے ہیں، کیونکہ دنیا کے کئی ممالک امریکہ پر اثر انداز ہونے کی کوشش کرتے ہیں۔ تاہم ان کے بقول اصل تشویش اس وقت پیدا ہوتی ہے جب امریکی قیادت ایسے بیرونی دباؤ کو اپنی پالیسیوں پر اثر انداز ہونے دے۔
انہوں نے کہا کہ جب انہوں نے ایسی اطلاعات دیکھیں کہ ایک غیر ملکی اثر و رسوخ کی مہم اس معاہدے کو ناکام بنانے کے لیے فنڈنگ کر رہی ہے اور اس سے منسلک افراد ان پر ذاتی حملے کر رہے ہیں تو ان کا جواب واضح تھا کہ وہ صرف امریکی عوام کے مفاد میں فیصلے کریں گے۔
امریکی نائب صدر نے مزید دعویٰ کیا کہ اسرائیلی نظام کے اندر کچھ عناصر ایسے ہیں جو امریکی رائے عامہ کو اس سمت میں موڑنے کی کوشش کر رہے ہیں کہ ایران کے خلاف جنگ غیر معینہ مدت تک جاری رکھی جائے۔
