اسلام آباد: وفاقی وزیر توانائی اویس لغاری نے کہا ہے کہ حکومت ملک میں مسابقتی بجلی مارکیٹ کے قیام کی جانب تیزی سے پیشرفت کر رہی ہے، جبکہ نجکاری پروگرام کے پہلے مرحلے میں تین بجلی تقسیم کار کمپنیوں کی نجکاری کا عمل بھی شروع کر دیا گیا ہے۔
یہ بات انہوں نے گورنر خیبرپختونخوا فیصل کریم کنڈی سے ملاقات کے دوران کہی، جس میں پاور سیکٹر اصلاحات، توانائی کے شعبے کی بہتری اور مجموعی سیاسی صورتحال پر تبادلہ خیال کیا گیا۔
اویس لغاری نے کہا کہ گزشتہ دو برسوں کے دوران بجلی تقسیم کار کمپنیوں کی کارکردگی میں نمایاں بہتری آئی ہے، جبکہ لائن لاسز، مالی خسارے اور گردشی قرضے میں بھی خاطر خواہ کمی ریکارڈ کی گئی ہے۔
انہوں نے بتایا کہ حکومت پاور سیکٹر کے گردشی قرضے میں تقریباً 780 ارب روپے کی کمی لانے میں کامیاب ہوئی ہے، جبکہ قومی گرڈ کی ڈیجیٹائزیشن، ٹرانسمیشن نظام کی اپ گریڈیشن اور جدید میٹرنگ انفراسٹرکچر پر تیزی سے کام جاری ہے۔
وفاقی وزیر کے مطابق ملک بھر میں مرحلہ وار تقریباً 1 کروڑ 60 لاکھ بجلی کے میٹروں کو ڈیجیٹل نظام پر منتقل کیا جا رہا ہے تاکہ بجلی کی ترسیل، نگرانی اور بلنگ کے نظام کو مزید مؤثر بنایا جا سکے۔
انہوں نے کہا کہ اے پی ایم ایس (Advanced Power Management System) کے تحت ٹرانسفارمر کی سطح پر لوڈ مینجمنٹ متعارف کرایا جا رہا ہے، جس سے صارفین کو زیادہ سے زیادہ بلا تعطل اور بہتر بجلی کی فراہمی ممکن ہوگی۔
اس موقع پر گورنر خیبرپختونخوا فیصل کریم کنڈی نے پاور سیکٹر میں جاری اصلاحات اور توانائی کے شعبے کی بہتری کے لیے حکومتی اقدامات کو سراہتے ہوئے انہیں قابلِ ستائش قرار دیا۔
