ایران کے شہید رہبرِ اعلیٰ آیت اللہ علی خامنہ ای کا جسدِ خاکی دارالحکومت تہران کی گرینڈ مصلیٰ مسجد پہنچا دیا گیا ہے، جہاں ان کی نمازِ جنازہ اور سرکاری سوگ کی تقریبات کے لیے وسیع انتظامات کیے گئے ہیں۔
ایرانی سرکاری میڈیا کی جانب سے جاری کی گئی تصاویر میں مبینہ طور پر شہید رہبرِ اعلیٰ کا تابوت تہران کے مصلیٰ پریئر ہال پہنچتے ہوئے دکھایا گیا ہے، جہاں اعلیٰ حکومتی، عسکری اور مذہبی شخصیات سمیت ہزاروں افراد خراجِ عقیدت پیش کرنے کے لیے موجود ہیں۔
میڈیا رپورٹس کے مطابق ایرانی حکام کو توقع ہے کہ آیت اللہ علی خامنہ ای کی نمازِ جنازہ میں تقریباً 2 کروڑ (20 ملین) افراد شرکت کریں گے، جس کے باعث یہ تقریب ایران کی تاریخ کے سب سے بڑے عوامی جنازوں میں شمار ہو سکتی ہے۔
سرکاری ذرائع کے مطابق آخری رسومات کے مختلف مراحل مکمل ہونے کے بعد شہید رہبرِ اعلیٰ کی تدفین ان کے آبائی شہر مشہد میں امام رضاؑ کے روضے کے احاطے میں کی جائے گی، جہاں تدفینی تقریبات کا اختتام ہو گا۔
واضح رہے کہ ایرانی حکام کے مطابق رواں سال 28 فروری کو جنگ کے آغاز کے دوران ایران پر ہونے والے امریکی اور اسرائیلی حملوں میں آیت اللہ علی خامنہ ای اپنے خاندان کے متعدد افراد اور کئی اعلیٰ سرکاری و عسکری عہدیداروں کے ہمراہ جاں بحق ہوئے تھے، جس کے بعد ملک بھر میں کئی روزہ قومی سوگ اور تعزیتی تقریبات جاری ہیں۔
ایرانی حکومت نے نمازِ جنازہ اور تدفین کے سلسلے میں غیر معمولی سیکیورٹی انتظامات کیے ہیں، جبکہ مختلف ممالک کے سرکاری وفود اور اعلیٰ شخصیات کی شرکت بھی متوقع ہے۔
