ریاض: سعودی عرب کے وزیر داخلہ شہزادہ عبدالعزیز بن سعود بن نائف بن عبدالعزیز نے بدھ کے روز ریاض میں پاکستان کے وفاقی وزیر داخلہ محسن رضا نقوی کا استقبال کیا، جہاں دونوں رہنماؤں کے درمیان دوطرفہ تعلقات، سیکیورٹی تعاون اور مشترکہ مفادات سے متعلق امور پر تفصیلی بات چیت ہوئی۔
سعودی پریس ایجنسی (SPA) کے مطابق ملاقات کے اختتام پر دونوں ممالک کی وزارت داخلہ کے درمیان مفاہمت کی ایک یادداشت (ایم او یو) پر دستخط کیے گئے، جس کا مقصد سائنسی، تربیتی اور تحقیقی شعبوں میں تعاون کو فروغ دینا ہے۔
معاہدے کے تحت دونوں وزارتیں پیشہ ورانہ مہارت، تحقیق، تربیتی پروگراموں اور استعداد کار میں اضافے کے لیے ایک دوسرے کے تجربات سے استفادہ کریں گی۔ اس کے علاوہ باہمی دلچسپی کے مختلف شعبوں میں معلومات اور مہارت کے تبادلے کو بھی فروغ دیا جائے گا تاکہ ادارہ جاتی صلاحیتوں کو مزید مضبوط بنایا جا سکے۔
ملاقات کے دوران پاکستان اور سعودی عرب کے درمیان دیرینہ برادرانہ تعلقات کا جائزہ بھی لیا گیا اور اس عزم کا اعادہ کیا گیا کہ دونوں ممالک داخلی سلامتی، انسداد دہشت گردی، قانون نافذ کرنے والے اداروں کے درمیان تعاون اور سیکیورٹی ہم آہنگی کو مزید وسعت دیں گے۔
دونوں رہنماؤں نے اس بات پر بھی اتفاق کیا کہ وزارت داخلہ کی سطح پر قریبی روابط اور مشترکہ اقدامات نہ صرف دوطرفہ تعلقات کو مضبوط بنائیں گے بلکہ خطے میں امن، استحکام اور سلامتی کے فروغ میں بھی معاون ثابت ہوں گے۔
پاکستان اور سعودی عرب کے درمیان دفاعی، سیکیورٹی اور اقتصادی شعبوں میں تعاون مسلسل فروغ پا رہا ہے، جبکہ حالیہ مفاہمتی یادداشت کو دونوں ممالک کے اسٹریٹجک تعلقات میں ایک اور اہم پیش رفت قرار دیا جا رہا ہے۔
