واشنگٹن/تہران: امریکی صدر ڈونلڈ ٹرمپ نے دعویٰ کیا ہے کہ ایران نے امریکا سے ملاقات کی درخواست کی ہے اور دونوں ممالک کے درمیان ایک اہم ملاقات منگل کو قطر کے دارالحکومت دوحہ میں ہوگی۔ تاہم ایرانی حکام نے اس دعوے کی تردید کرتے ہوئے کہا ہے کہ اس ہفتے امریکا کے ساتھ کسی براہِ راست تکنیکی مذاکرات کا امکان نہیں۔
ڈونلڈ ٹرمپ نے سوشل میڈیا پر جاری اپنے مختصر بیان میں جلی حروف میں لکھا کہ "ایران نے ملاقات کی درخواست کی ہے، یہ ملاقات کل دوحہ میں ہوگی۔”
امریکی صدر نے اپنے بیان میں عالمی توانائی کی منڈی کا حوالہ دیتے ہوئے کہا کہ گیس کی قیمتیں تیزی سے کم ہو رہی ہیں جبکہ خام تیل کی قیمت بھی ایران کے ساتھ حالیہ کشیدگی سے پہلے کی سطح سے نیچے آ چکی ہے۔
دوسری جانب وائٹ ہاؤس کے ترجمان نے بتایا کہ اگر مذاکرات ہوتے ہیں تو امریکی وفد کی نمائندگی امریکی نمائندہ خصوصی اسٹیو وٹکوف اور صدر ٹرمپ کے داماد جیرڈ کُشنر کریں گے۔
تاہم ایران نے امریکی دعووں سے اختلاف کرتے ہوئے کسی بھی براہِ راست مذاکرات کی خبروں کو مسترد کر دیا ہے۔
ایران کے نائب وزیر خارجہ کاظم غریب آبادی نے کہا کہ اس ہفتے "ایران-امریکا ورکنگ گروپس” کے تکنیکی مذاکرات کا کوئی امکان نہیں ہے۔ ان کے مطابق موجودہ صورتحال میں دونوں ممالک کے درمیان رابطے صرف ثالث ممالک کے ذریعے جاری ہیں اور کسی براہِ راست اجلاس کا فیصلہ نہیں ہوا۔
یہ متضاد بیانات ایسے وقت میں سامنے آئے ہیں جب حالیہ دنوں میں ایران اور امریکا کے درمیان کشیدگی، آبنائے ہرمز کی صورتحال اور جنگ بندی سے متعلق مختلف سفارتی سرگرمیاں جاری ہیں، تاہم دونوں ممالک کی جانب سے مذاکرات کے حوالے سے اب تک مختلف مؤقف اختیار کیے جا رہے ہیں۔
