عوامی لیگ کو ختم نہیں کیا جا سکتا، ہر رکاوٹ عبور کرکے وطن واپس آؤں گی: شیخ حسینہ واجد

ڈھاکہ/نئی دہلی: بنگلہ دیش کی سابق وزیراعظم شیخ حسینہ واجد نے اعلان کیا ہے کہ وہ رواں سال ہر قسم کی رکاوٹوں کے باوجود وطن واپس آئیں گی۔ انہوں نے اپنے خلاف قائم مقدمات اور سنائے گئے سزائے موت کے فیصلے کو سیاسی انتقام قرار دیتے ہوئے کہا کہ عوامی لیگ کو ختم کرنا ممکن نہیں کیونکہ یہ صرف ایک سیاسی جماعت نہیں بلکہ بنگلہ دیش کے عوام کی طاقت اور قومی شناخت کی علامت ہ

بھارتی نشریاتی ادارے کو جلاوطنی کے دوران ای میل کے ذریعے دیے گئے خصوصی انٹرویو میں شیخ حسینہ نے کہا کہ ان کی وطن واپسی کسی ذاتی مفاد یا اقتدار کے حصول کے لیے نہیں بلکہ بنگلہ دیش میں جمہوریت، قانون کی حکمرانی اور عوام کے سیاسی حقوق کی بحالی کے لیے ہوگی۔

انہوں نے کہا کہ وہ ہمیشہ عوام کی خدمت اور بنگلہ دیش کے بانی شیخ مجیب الرحمٰن کے "سنہری بنگلہ” کے خواب کو حقیقت بنانے کے لیے سیاست کرتی رہی ہیں اور آئندہ بھی اسی مقصد کے لیے جدوجہد جاری رکھیں گی۔

سابق وزیراعظم نے اپنے خلاف سزائے موت کے فیصلے کو غیر آئینی، غیر قانونی اور سیاسی انتقام پر مبنی قرار دیتے ہوئے الزام عائد کیا کہ عدلیہ کو عوامی لیگ کی قیادت کو ختم کرنے کے لیے استعمال کیا جا رہا ہے۔

انہوں نے کہا کہ وہ موت سے خوفزدہ نہیں کیونکہ 1975ء میں اپنے والدین، بھائیوں اور خاندان کے بیشتر افراد کو کھو چکی ہیں جبکہ 21 اگست کے گرینیڈ حملے میں بھی انہیں قتل کرنے کی کوشش کی گئی تھی، تاہم تمام سازشوں کے باوجود وہ عوام کے ساتھ ڈٹی رہیں۔

شیخ حسینہ نے کہا کہ وہ عوام کے ووٹوں سے پانچ مرتبہ بنگلہ دیش کی وزیراعظم منتخب ہوئیں اور اپنے ادوار حکومت میں ملک کی ترقی، معاشی استحکام اور عوامی فلاح کے لیے نمایاں اقدامات کیے، اسی اعتماد کی بنیاد پر انہیں یقین ہے کہ تمام رکاوٹوں کے باوجود وہ رواں برس اپنے وطن واپس آئیں گی۔

عوامی لیگ کی سیاسی حیثیت پر بات کرتے ہوئے انہوں نے کہا کہ یہ کوئی کاغذی جماعت نہیں بلکہ بنگالی قوم، تاریخ اور ریاستی شناخت کا اہم حصہ ہے۔ انہوں نے یاد دلایا کہ گزشتہ 77 برسوں میں عوامی لیگ پر کئی مرتبہ پابندیاں لگائی گئیں، کارکنوں نے قربانیاں دیں اور جماعت نے سخت مشکلات کا سامنا کیا، مگر ہر آزمائش کے بعد یہ پہلے سے زیادہ مضبوط ہو کر ابھری۔

سیاسی مبصرین کے مطابق شیخ حسینہ کا یہ بیان ایسے وقت سامنے آیا ہے جب بنگلہ دیش کی داخلی سیاست میں غیر یقینی صورتحال برقرار ہے اور ان کی ممکنہ وطن واپسی ملکی سیاسی منظرنامے پر گہرے اثرات مرتب کر سکتی ہے۔