تہران: ایرانی خاتم الانبیاء مرکزی ہیڈکوارٹر نے اسرائیل کو سخت انتباہ جاری کرتے ہوئے کہا ہے کہ اگر اسرائیلی جنگی طیارے پڑوسی ممالک کی فضائی حدود استعمال کرتے ہوئے ایران کی جانب کسی بھی قسم کی پرواز کریں گے تو انہیں ایران کی قومی سلامتی کے لیے براہِ راست خطرہ تصور کیا جائے گا۔
ایرانی سرکاری میڈیا کے مطابق خاتم الانبیاء مرکزی ہیڈکوارٹر کی جانب سے جاری بیان میں کہا گیا ہے کہ ایسے اقدامات نہ صرف خطے کے امن و استحکام کے لیے خطرناک ہیں بلکہ ایران کی خودمختاری اور سلامتی کے لیے بھی سنگین خطرہ ہیں۔
بیان میں واضح کیا گیا کہ ایران اپنے خلاف کسی بھی قسم کی فوجی سرگرمی یا ممکنہ حملے کو برداشت نہیں کرے گا اور اگر اسرائیلی طیارے ہمسایہ ممالک کی فضائی حدود استعمال کرتے ہوئے ایران کے خلاف کارروائی کی کوشش کرتے ہیں تو تہران مناسب اور مؤثر جواب دینے کا حق محفوظ رکھتا ہے۔
ایرانی فوجی قیادت نے اپنے بیان میں امریکا کا بھی ذکر کرتے ہوئے کہا کہ اگر واشنگٹن اسرائیل کی ممکنہ عسکری کارروائیوں کو روکنے یا ان پر مؤثر کنٹرول قائم رکھنے میں ناکام رہتا ہے تو ایران اپنی قومی سلامتی کے تحفظ کے لیے ضروری اقدامات کرنے میں ہچکچاہٹ کا مظاہرہ نہیں کرے گا۔
خاتم الانبیاء مرکزی ہیڈکوارٹر نے زور دیا کہ ایران کی دفاعی حکمت عملی واضح ہے اور ملک اپنی سرحدوں، فضائی حدود اور قومی مفادات کے خلاف کسی بھی خطرے کا بھرپور جواب دینے کی صلاحیت رکھتا ہے۔
یہ بیان ایسے وقت میں سامنے آیا ہے جب مشرقِ وسطیٰ میں سکیورٹی صورتحال بدستور کشیدہ ہے اور ایران، اسرائیل اور امریکا کے درمیان حالیہ کشیدگی کے باعث خطے میں ممکنہ فوجی تصادم کے خدشات پر عالمی برادری گہری نظر رکھے ہوئے ہے۔
