وفاقی جمہوریہ ایتھوپیا کے پاکستان میں سفیر ڈاکٹر عمر حسین اوبا نے چئیرمین سینٹ سید یوسف رضا گیلانی سے نے ان کی رہائش گاہ پر ملاقات کی، جس میں پاکستان اور ایتھوپیا کے درمیان سیاسی، پارلیمانی، اقتصادی، تعلیمی اور ثقافتی تعاون کو مزید فروغ دینے پر تبادلہ خیال کیا گیا۔
سینیٹ سیکرٹریٹ کے مطابق چیئرمین سینیٹ نے ایتھوپیا کے سفیر کا خیرمقدم کرتے ہوئے ایتھوپیا کی قیادت اور عوام کے لیے نیک خواہشات کا اظہار کیا اور دونوں ممالک کے درمیان تاریخی اور دوستانہ تعلقات کو مزید مضبوط بنانے کے عزم کا اعادہ کیا۔
انہوں نے سابق وزیراعظم اور قائد ذوالفقار علی بھٹو کے 1973ء میں ایتھوپیا کے دورے اور ادیس ابابا میں پاکستانی سفارت خانے کے قیام کو دونوں ممالک کے تعلقات میں اہم سنگِ میل قرار دیا۔
چیئرمین سینیٹ نے پاکستان اور ایتھوپیا کے درمیان مجوزہ سیاسی مشاورتی معاہدے کا خیرمقدم کرتے ہوئے کہا کہ اس سے سفارتی روابط مزید مستحکم ہوں گے اور علاقائی و عالمی امور پر تعاون کو فروغ ملے گا۔
پارلیمانی سفارتکاری کی اہمیت پر زور دیتے ہوئے انہوں نے سینیٹ آف پاکستان میں پاکستان۔ایتھوپیا فرینڈشپ گروپ کے قیام کا ذکر کیا اور دونوں ممالک کے درمیان پارلیمانی رابطوں اور مستقل مکالمے کے فروغ کی ضرورت پر زور دیا۔ انہوں نے اقوام متحدہ، Inter-Parliamentary Union، Commonwealth Parliamentary Association اور Asian Parliamentary Assembly جیسے بین الاقوامی پارلیمانی فورمز میں تعاون بڑھانے کی بھی حمایت کی۔
چیئرمین سینیٹ نے ایتھوپیا کی پارلیمنٹ کے اسپیکر کو وفد کے ہمراہ پاکستان کے دورے کی دعوت دیتے ہوئے کہا کہ اعلیٰ سطحی وفود کے تبادلے دونوں ممالک کے تعلقات کو مزید وسعت دے سکتے ہیں۔
اقتصادی تعاون کے حوالے سے انہوں نے پاکستان کی "اینگیج افریقہ پالیسی” کو افریقی ممالک کے ساتھ روابط مضبوط بنانے کا مؤثر ذریعہ قرار دیا اور کہا کہ موجودہ تجارتی حجم دونوں ممالک کی حقیقی معاشی صلاحیتوں کی عکاسی نہیں کرتا۔ انہوں نے زراعت، ادویات، انجینئرنگ، ٹیکسٹائل، انفارمیشن ٹیکنالوجی، کاسمیٹکس اور اسپورٹس گڈز کے شعبوں میں تعاون بڑھانے پر زور دیا۔
چیئرمین سینیٹ نے اسلام آباد میں ایتھوپیا کے سفارت خانے کے قیام، براہِ راست فضائی روابط اور "ایتھو۔پاکستان گرین ڈائیلاگ” جیسے اقدامات کو دونوں ممالک کے تعلقات میں مثبت پیش رفت قرار دیا۔
انہوں نے تعلیمی شعبے میں وظائف، جامعات اور تحقیقی اداروں کے درمیان روابط بڑھانے اور مشترکہ تحقیق کو فروغ دینے کی ضرورت پر بھی زور دیا۔
ملاقات کے دوران دونوں فریقوں نے سیاسی، اقتصادی، ماحولیاتی، تعلیمی اور ثقافتی شعبوں میں تعاون کو مزید وسعت دینے کے عزم کا اعادہ کیا، جبکہ ایتھوپیا کے سفیر نے پاکستان کی جانب سے افریقی ممالک کے ساتھ بڑھتے ہوئے تعاون کو سراہا۔
