امریکی صدر ڈونلڈ ٹرمپ نے دعویٰ کیا ہے کہ شدت پسند تنظیم آئی ایس آئی ایس کے عالمی سطح پر دوسرے بڑے کمانڈر ابو بلال المنوکی کو امریکی اور نائیجیرین فورسز کی مشترکہ کارروائی میں ہلاک کر دیا گیا ہے۔
امریکی صدر نے اپنے بیان میں کہا کہ ابو بلال المنوکی داعش کے اہم ترین رہنماؤں میں شمار ہوتا تھا اور مختلف خطوں میں تنظیم کی کارروائیوں کی منصوبہ بندی میں کلیدی کردار ادا کر رہا تھا۔
ٹرمپ کے مطابق یہ آپریشن امریکی اور نائجریا کی سیکیورٹی فورسز کے تعاون سے انجام دیا گیا، جس میں شدت پسند کمانڈر کو کامیابی سے نشانہ بنایا گیا۔
امریکی حکام کی جانب سے فوری طور پر آپریشن کی مزید تفصیلات جاری نہیں کی گئیں، جبکہ نائیجیرین حکام نے بھی اس حوالے سے محدود معلومات فراہم کی ہیں۔
ماہرین کے مطابق اگر ابو بلال المنوکی کی ہلاکت کی تصدیق مکمل طور پر ہو جاتی ہے تو یہ افریقی خطے میں داعش کے نیٹ ورک کے لیے ایک بڑا دھچکا تصور کیا جائے گا، کیونکہ حالیہ برسوں میں تنظیم نے مغربی اور وسطی افریقہ میں اپنی سرگرمیوں میں اضافہ کیا تھا۔
دوسری جانب سوشل میڈیا اور بین الاقوامی سیکیورٹی حلقوں میں اس کارروائی پر تبصرے جاری ہیں، تاہم آزاد ذرائع سے ابھی تک مکمل تصدیق سامنے نہیں آئی۔
