ماسکو: روس کا جدید ترین پانچویں نسل کا جنگی طیارہ Su-57 تربیتی پرواز کے دوران حادثے کا شکار ہو کر گر کر تباہ ہو گیا، تاہم پائلٹ بروقت ایجیکشن سسٹم استعمال کرتے ہوئے بحفاظت باہر نکلنے میں کامیاب رہا۔
غیر ملکی میڈیا رپورٹس کے مطابق حادثہ ماسکو کے نواحی دیہی علاقے میں پیش آیا، جہاں طیارہ معمول کی تربیتی پرواز انجام دے رہا تھا۔ حادثے کے فوراً بعد امدادی اور متعلقہ اداروں نے علاقے کو گھیرے میں لے کر کارروائیاں شروع کر دیں۔
رپورٹس کے مطابق پائلٹ نے طیارہ گرنے سے قبل کامیابی سے ایجیکٹ کر لیا، جس کے باعث وہ محفوظ رہا اور اسے کوئی جانی نقصان نہیں پہنچا۔
روسی وزارتِ دفاع نے تاحال حادثے کی وجوہات یا طیارے کے نقصان سے متعلق تفصیلی بیان جاری نہیں کیا، جبکہ حادثے کی تحقیقات شروع کر دی گئی ہیں تاکہ معلوم کیا جا سکے کہ یہ واقعہ تکنیکی خرابی، انسانی غلطی یا کسی اور سبب سے پیش آیا۔
Su-57 روس کا جدید ترین اسٹیلتھ ملٹی رول فائٹر جیٹ ہے، جسے فضائی برتری، زمینی اہداف پر حملوں اور جدید جنگی آپریشنز کے لیے تیار کیا گیا ہے۔ اسے روسی فضائیہ کے جدید ترین جنگی طیاروں میں شمار کیا جاتا ہے۔
