کوئٹہ: پاکستان میں برطانیہ کی ہائی کمشنر جین میریٹ نے وزیراعلیٰ بلوچستان میر سرفراز بگٹی سے ملاقات کی، جس میں باہمی دلچسپی کے امور، بلوچستان میں ترقیاتی تعاون اور پاکستان و برطانیہ کے دوطرفہ تعلقات کے فروغ پر تفصیلی تبادلہ خیال کیا گیا۔
ملاقات کے دوران بلوچستان میں تعلیم، صحت، گورننس، سرمایہ کاری اور دیگر ترقیاتی شعبوں میں تعاون کے امکانات کا جائزہ لیا گیا، جبکہ صوبے میں جاری ترقیاتی منصوبوں اور اصلاحاتی اقدامات پر بھی گفتگو ہوئی۔
وزیراعلیٰ بلوچستان میر سرفراز بگٹی نے برطانوی ہائی کمشنر کو حکومت کی جانب سے جاری اصلاحات، عوامی فلاحی منصوبوں اور ترقیاتی اقدامات سے آگاہ کرتے ہوئے کہا کہ بلوچستان میں امن، پائیدار ترقی اور عوامی فلاح حکومت کی اولین ترجیحات ہیں۔
انہوں نے کہا کہ بین الاقوامی شراکت داروں کے تعاون سے بلوچستان میں سرمایہ کاری، ترقی اور خوشحالی کے نئے مواقع پیدا کیے جا رہے ہیں، جن سے صوبے کی معیشت اور عوام کی زندگیوں میں مثبت تبدیلی آئے گی۔
برطانوی ہائی کمشنر جین میریٹ نے بلوچستان میں جاری ترقیاتی اقدامات میں دلچسپی کا اظہار کرتے ہوئے مختلف شعبوں میں تعاون کے فروغ کے عزم کا اعادہ کیا۔
