نیامی: مغربی افریقی ملک نائجر کے مغربی علاقے تیرا میں دہشت گردوں کے حملے میں دفاعی و سکیورٹی فورسز کے 16 اہلکار جاں بحق جبکہ 23 زخمی ہوگئے۔
چینی خبر رساں ایجنسی شنہوا کے مطابق نائجر کی وزارتِ دفاع نے اپنے بیان میں کہا ہے کہ حملہ گزشتہ روز تیلابیری کے علاقے میں کیا گیا، جو مالی اور برکینا فاسو کی سرحدوں کے قریب واقع ہے اور طویل عرصے سے عسکریت پسندوں کی سرگرمیوں کا مرکز سمجھا جاتا ہے۔
وزارتِ دفاع کے مطابق حملے کے فوراً بعد سکیورٹی فورسز نے فضائی معاونت کے ساتھ بھرپور جوابی کارروائی کی، جس کے نتیجے میں 15 دہشت گرد ہلاک ہوگئے۔
بیان میں مزید کہا گیا کہ کارروائی کے دوران دہشت گردوں کی 5 موٹرسائیکلیں قبضے میں لے لی گئیں جبکہ 4 دیگر موٹرسائیکلیں تباہ کر دی گئیں۔
وزارتِ دفاع کے مطابق شدید مزاحمت کے بعد حملہ آور پسپا ہونے پر مجبور ہوگئے، جبکہ متاثرہ علاقے میں سرچ، کلیئرنس اور سکیورٹی آپریشنز جاری ہیں تاکہ مزید خطرات کا خاتمہ کیا جا سکے۔
نائجر، مالی اور برکینا فاسو کے سرحدی علاقے حالیہ برسوں میں شدت پسند تنظیموں کی کارروائیوں کے باعث غیر محفوظ سمجھے جاتے ہیں، جہاں سکیورٹی فورسز پر حملوں میں مسلسل اضافہ دیکھا جا رہا ہے۔
