ایرانی پاسدارانِ انقلاب نے دعویٰ کیا ہے کہ اس نے قطر میں واقع امریکی العدید ایئر بیس کو نشانہ بنایا ہے۔ تہران سے جاری بیان میں کہا گیا ہے کہ کارروائی کے دوران امریکی فوج کی اہم عسکری تنصیبات کو ہدف بنایا گیا۔
پاسدارانِ انقلاب کے مطابق حملے میں العدید ایئر بیس پر نصب لانگ رینج ریڈار سسٹم کو تباہ کر دیا گیا، جبکہ متعدد امریکی اسٹریٹیجک فضائی ایندھن بردار طیاروں (Strategic Refueling Aircraft) کو بھی نشانہ بنایا گیا۔
بیان میں مزید دعویٰ کیا گیا کہ کئی ریفیولنگ طیارے مکمل طور پر تباہ ہوئے جبکہ متعدد دیگر کو شدید نقصان پہنچا، جس سے امریکی فضائی آپریشنز متاثر ہو سکتے ہیں۔
ایرانی حکام کا کہنا ہے کہ یہ کارروائی امریکی اقدامات کے جواب میں کی گئی ہے اور ایران اپنی قومی سلامتی کے تحفظ کے لیے ہر ممکن اقدام جاری رکھے گا۔
دوسری جانب اس دعوے پر امریکی حکام یا قطری حکومت کی جانب سے فوری طور پر کوئی باضابطہ ردعمل سامنے نہیں آیا، جبکہ آزاد ذرائع سے بھی ایرانی دعووں کی فوری تصدیق نہیں ہو سکی ہے۔
خطے میں ایران اور امریکا کے درمیان بڑھتی ہوئی کشیدگی کے باعث مشرقِ وسطیٰ کی سیکیورٹی صورتحال مسلسل غیر یقینی کا شکار ہے اور عالمی برادری تنازع مزید پھیلنے کے خدشات کا اظہار کر رہی ہے۔
