خیبرپختونخوا کے ضلع بنوں میں محکمہ انسداد دہشت گردی (سی ٹی ڈی) اور مقامی پولیس نے مشترکہ انٹیلیجنس بیسڈ آپریشن (IBO) کے دوران پانچ دہشت گردوں کو ہلاک کر دیا، جبکہ فرار ہونے والے دیگر ملزمان کی تلاش کے لیے سرچ اینڈ کلیئرنس آپریشن جاری ہے۔
سی ٹی ڈی بنوں ریجن کے مطابق یہ کارروائی ضلع بنوں کے علاقے گلبہار، تھانہ حوید کی حدود میں دہشت گردوں کی موجودگی کی مصدقہ اطلاع پر کی گئی۔ آپریشن انتہائی منظم منصوبہ بندی اور پیشہ ورانہ حکمت عملی کے تحت کیا گیا تاکہ دہشت گردوں کی نقل و حرکت کو محدود کرتے ہوئے انہیں گرفتار یا غیر مؤثر بنایا جا سکے۔
بیان کے مطابق سکیورٹی اہلکاروں کے پہنچتے ہی دہشت گردوں نے اندھا دھند فائرنگ شروع کر دی، جس کے جواب میں سی ٹی ڈی کی اسپیشل ویپنز اینڈ ٹیکٹکس (SWAT) ٹیم اور مقامی پولیس نے مؤثر جوابی کارروائی کی۔ دونوں جانب تقریباً 40 منٹ تک فائرنگ کا تبادلہ جاری رہا۔
آپریشن کے بعد علاقے میں سرچ اینڈ کلیئرنس کارروائی کے دوران پانچ دہشت گرد ہلاک ہوئے، جبکہ متعدد دیگر ملزمان موقع سے فرار ہونے میں کامیاب ہو گئے۔ پولیس کی اضافی نفری نے فوری طور پر علاقے کا محاصرہ کر لیا اور فرار دہشت گردوں کی گرفتاری کے لیے تعاقبی کارروائیاں جاری ہیں۔
سی ٹی ڈی کے مطابق ہلاک دہشت گردوں کی شناخت، کرمنل پروفائلنگ اور فرانزک تجزیہ جاری ہے۔ اس کے ساتھ ساتھ ان کے مبینہ سہولت کاروں، مالی معاونین، لاجسٹک سپورٹرز اور دہشت گرد نیٹ ورکس کے خلاف بھی قانونی کارروائی عمل میں لائی جائے گی۔
کارروائی کے دوران دہشت گردوں کے قبضے سے پانچ کلاشنکوفیں، دس میگزین، پانچ بنڈولیئر، دو ہینڈ گرینیڈ اور بڑی مقدار میں گولہ بارود برآمد کیا گیا، جسے فرانزک جانچ اور مزید تفتیش کے لیے تحویل میں لے لیا گیا ہے۔
انسپکٹر جنرل پولیس خیبرپختونخوا ذوالفقار حمید اور ایڈیشنل آئی جی سی ٹی ڈی نے کامیاب آپریشن پر سی ٹی ڈی کی SWAT ٹیم اور مقامی پولیس کے جوانوں کی پیشہ ورانہ مہارت، جرات اور بروقت کارروائی کو سراہتے ہوئے انہیں شاباش دی۔
آئی جی خیبرپختونخوا نے کہا کہ دہشت گردوں، ان کے سہولت کاروں اور معاون نیٹ ورکس کے خلاف انٹیلیجنس پر مبنی کارروائیاں مزید مؤثر انداز میں جاری رکھی جائیں گی اور انہیں ان کے محفوظ ٹھکانوں تک تعاقب کر کے قانون کے کٹہرے میں لایا جائے گا۔ انہوں نے اس عزم کا بھی اظہار کیا کہ دہشت گردی کے مکمل خاتمے، ریاستی رٹ کے استحکام اور عوام کے جان و مال کے تحفظ کے لیے خیبرپختونخوا پولیس اور سی ٹی ڈی اپنی کارروائیاں بلا تعطل جاری رکھیں گی۔
