اسلام آباد: پاکستان نے خطے میں بڑھتی ہوئی کشیدگی پر گہری تشویش کا اظہار کرتے ہوئے تمام متعلقہ فریقین پر زور دیا ہے کہ وہ تحمل کا مظاہرہ کریں اور کشیدگی میں فوری کمی کے لیے مؤثر اقدامات کریں۔
ترجمان دفتر خارجہ کی جانب سے جاری بیان میں کہا گیا ہے کہ پاکستان خطے کے تمام برادر ممالک کی خودمختاری، آزادی اور علاقائی سالمیت کی مکمل حمایت کا اعادہ کرتا ہے اور امن و استحکام کو خطے کی مشترکہ ضرورت سمجھتا ہے۔
بیان میں تمام فریقین سے اپیل کی گئی کہ وہ ذمہ داری کا مظاہرہ کرتے ہوئے ایسے اقدامات سے گریز کریں جو مزید کشیدگی کا باعث بن سکتے ہیں، اور فوری طور پر حالات کو معمول پر لانے کے لیے عملی اقدامات کریں۔
ترجمان نے اس بات پر بھی زور دیا کہ متعلقہ فریقین اسلام آباد مفاہمتی یادداشت کے تحت کیے گئے اپنے وعدوں اور ذمہ داریوں کی مکمل پاسداری کریں تاکہ موجودہ بحران کو مزید سنگین ہونے سے روکا جا سکے۔
دفتر خارجہ کے مطابق پاکستان اس بات پر یقین رکھتا ہے کہ خطے میں دیرپا امن، سلامتی اور استحکام کا واحد مؤثر راستہ مذاکرات، سفارتکاری اور باہمی تعاون ہے۔ پاکستان نے اس عزم کا بھی اعادہ کیا کہ وہ تنازعات کے پرامن حل اور خطے میں امن کے فروغ کے لیے اپنی تعمیری سفارتی کوششیں جاری رکھے گا۔
