لاہور: پاکستان وائٹ بال کرکٹ ٹیم کے فیلڈنگ کوچ شین میکڈرمٹ نے اپنے عہدے سے استعفیٰ دے دیا ہے۔ آسٹریلیا سے تعلق رکھنے والے کوچ نے اپنا استعفیٰ پاکستان کرکٹ بورڈ (پی سی بی) کو ارسال کر دیا ہے۔
ذرائع کے مطابق شین میکڈرمٹ نے نجی مصروفیات اور ذاتی وجوہات کے باعث اپنی ذمہ داریوں سے علیحدگی اختیار کرنے کا فیصلہ کیا۔ وہ کچھ عرصہ قبل پی سی بی سے چھٹی حاصل کرنے کے بعد اپنے وطن آسٹریلیا واپس گئے تھے۔
ذرائع کا کہنا ہے کہ شین میکڈرمٹ کا پی سی بی کے ساتھ تین سالہ معاہدہ تھا، تاہم انہوں نے معاہدے کی مدت مکمل ہونے سے قبل ہی استعفیٰ دے دیا۔
شین میکڈرمٹ نے 5 جولائی 2025 کو پاکستان کرکٹ ٹیم کے فیلڈنگ کوچ کی حیثیت سے اپنی ذمہ داریاں سنبھالی تھیں اور وہ قومی وائٹ بال ٹیم کے ساتھ کام کر رہے تھے۔
ان کے دورِ کوچنگ میں پاکستان ٹیم کی فیلڈنگ میں نمایاں بہتری دیکھی گئی، جسے کرکٹ حلقوں نے ان کی پیشہ ورانہ مہارت اور محنت کا نتیجہ قرار دیا۔
شین میکڈرمٹ کے استعفے کے بعد پاکستان کرکٹ بورڈ کو آئندہ بین الاقوامی مصروفیات سے قبل قومی وائٹ بال ٹیم کے لیے نئے فیلڈنگ کوچ کی تقرری کا چیلنج درپیش ہوگا۔
