تہران: ایران پر امریکی فوج کے تازہ حملوں کے بعد ایرانی پاسدارانِ انقلاب (IRGC) نے جوابی کارروائیوں کا دعویٰ کرتے ہوئے کہا ہے کہ جنوبی ایران میں ایک امریکی ڈرون مار گرایا گیا ہے جبکہ بحرین اور کویت میں 85 امریکی اہداف کو نشانہ بنایا گیا ہے۔
ایرانی میڈیا کے مطابق پاسدارانِ انقلاب نے اپنے بیان میں کہا کہ امریکی کارروائیوں کے بعد ایرانی افواج نے مختلف اہداف کے خلاف جوابی اقدامات کیے ہیں، تاہم ان دعوؤں کی آزاد ذرائع سے فوری طور پر تصدیق نہیں ہو سکی۔
دوسری جانب ایران کے اعلیٰ مذاکرات کار اور پارلیمنٹ کے اسپیکر محمد باقر قالیباف نے امریکا پر جنگ بندی سے متعلق مفاہمتی یادداشت (MOU) کی سنگین خلاف ورزی کا الزام عائد کیا۔
انہوں نے کہا کہ جنوبی ایران پر امریکی حملے، ایرانی تیل کی مصنوعات پر پابندیوں کی بحالی اور مزید فوجی کارروائیوں کی دھمکیاں جنگ بندی مفاہمت کے منافی ہیں۔
باقر قالیباف کا کہنا تھا کہ امریکا نے آبنائے ہرمز سے متعلق ایران کے اقدامات اور مفاہمتی شرائط کی بھی خلاف ورزی کی ہے۔
انہوں نے مزید کہا کہ دھونس، دھمکی اور طاقت کے ذریعے مطالبات منوانے کا دور ختم ہو چکا ہے اور ایران کسی بھی بیرونی دباؤ کے سامنے نہیں جھکے گا۔
ایرانی اسپیکر نے یہ بھی الزام عائد کیا کہ لبنان میں اسرائیل کی جاری فوجی کارروائیاں بھی جنگ بندی سے متعلق مفاہمتی اصولوں کی خلاف ورزی ہیں۔
ادھر امریکی حکام کی جانب سے ایران کے ان دعوؤں، خصوصاً امریکی ڈرون گرائے جانے اور بحرین و کویت میں 85 امریکی اہداف پر حملوں کے حوالے سے فوری طور پر کوئی باضابطہ تصدیق یا ردعمل سامنے نہیں آیا۔
