کور کمانڈرز کانفرنس میں دہشت گردی، سندھ طاس معاہدے اور کشمیر پر اہم اعلامیہ جاری

راولپنڈی: فیلڈ مارشل سید عاصم منیر، نشانِ امتیاز (ملٹری)، ہلالِ جرات، چیف آف آرمی اسٹاف اور چیف آف ڈیفنس فورسز کی زیر صدارت 276ویں کور کمانڈرز کانفرنس منعقد ہوئی، جس میں قومی سلامتی، دہشت گردی، علاقائی صورتحال، سندھ طاس معاہدہ اور کشمیر سمیت اہم قومی و علاقائی امور کا تفصیلی جائزہ لیا گیا۔

کانفرنس کے اعلامیے میں افغان طالبان کے زیرِ انتظام علاقوں سے پاکستان کے خلاف بھارتی حمایت یافتہ دہشت گرد گروہوں کی منصوبہ بندی اور حملوں کے لیے افغان سرزمین کے مسلسل استعمال پر شدید تشویش کا اظہار کیا گیا۔

افغان طالبان پر ذمہ داری عائد

فورم نے واضح کیا کہ خطے میں پائیدار امن اور استحکام اس وقت تک ممکن نہیں جب تک افغان سرزمین کو بھارتی پراکسی دہشت گرد گروہوں کی سرگرمیوں کے لیے استعمال ہونے سے نہ روکا جائے۔

اعلامیے میں کہا گیا کہ افغان طالبان کی موجودہ انتظامیہ کی ذمہ داری ہے کہ ان کے زیرِ انتظام علاقے پاکستان کے خلاف دہشت گردی کے لیے استعمال نہ ہوں۔

آپریشن "غضب للحق” جاری رکھنے کا اعلان

کور کمانڈرز کانفرنس نے اس عزم کا اظہار کیا کہ پاکستان اپنی عوام کے تحفظ اور قومی دفاع کے لیے ہر ممکن اقدام کا حق محفوظ رکھتا ہے۔

اعلامیے کے مطابق پاک فوج آپریشن "غضب للحق” کے تحت افغان سرزمین سے ہونے والی دہشت گردی کے خلاف انٹیلی جنس پر مبنی کارروائیاں جاری رکھے گی۔

بہتر طرز حکمرانی پر زور

فورم نے دہشت گردی سے متاثرہ علاقوں میں مؤثر گورننس کو ناگزیر قرار دیتے ہوئے کہا کہ ایسا مضبوط انتظامی نظام قائم کیا جائے جو عوامی خدمت، ترقی اور فلاح و بہبود کو یقینی بنانے کے ساتھ ساتھ دہشت گردی، جرائم اور ان کی سیاسی سرپرستی کے گٹھ جوڑ کو بھی ختم کرے۔

ہائبرڈ وارفیئر کا مقابلہ کرنے کا عزم

کور کمانڈرز نے کہا کہ معرکۂ حق میں شکست کے بعد دشمن ہائبرڈ وارفیئر، جھوٹے بیانیوں اور پروپیگنڈے کے ذریعے پاکستان میں عدم استحکام پیدا کرنا چاہتا ہے۔

فورم نے واضح کیا کہ بیرونی سرپرستی میں انتشار پھیلانے کی ہر کوشش کو پوری قوت کے ساتھ ناکام بنایا جائے گا۔

سندھ طاس معاہدے پر دوٹوک مؤقف

اجلاس میں بھارت کی جانب سے سندھ طاس معاہدے سے متعلق حالیہ بیانات کا بھی نوٹس لیا گیا۔

فورم نے کہا کہ 24 اپریل 2025 کو قومی سلامتی کمیٹی کے جاری کردہ فیصلے اس معاملے پر پاکستان کے مؤقف کی مکمل رہنمائی کرتے ہیں۔

اعلامیے میں کہا گیا کہ افواجِ پاکستان حکومتی ہدایات اور عوامی امنگوں کے مطابق پاکستان کے جائز آبی حقوق کے تحفظ اور پانی کی دستیابی یقینی بنانے کے لیے ہر ضروری اقدام اٹھانے سے گریز نہیں کریں گی۔

کشمیر پاکستان کی شہ رگ قرار

کور کمانڈرز کانفرنس نے ایک مرتبہ پھر اس مؤقف کا اعادہ کیا کہ کشمیر پاکستان کی شہ رگ ہے اور خطے میں پائیدار امن کا انحصار کشمیری عوام کو اقوام متحدہ کی سلامتی کونسل کی قراردادوں کے مطابق ان کا ناقابلِ تنسیخ حقِ خودارادیت دینے پر ہے۔

ملٹی ڈومین ٹرانسفارمیشن پر عمل تیز کرنے کی ہدایت

فیلڈ مارشل سید عاصم منیر نے تمام کمانڈرز کو جنگ کے بدلتے ہوئے تقاضوں کے مطابق ملٹی ڈومین ٹرانسفارمیشن پلان پر تیزی سے عمل درآمد کی ہدایت دیتے ہوئے اس بات پر زور دیا کہ پاکستان کی خودمختاری، سالمیت اور قومی مفادات کا ہر قیمت پر تحفظ یقینی بنایا جائے۔