لاہور: پاکستان کرکٹ بورڈ (پی سی بی) نے ویسٹ انڈیز اور انگلینڈ کے آئندہ دوروں کے لیے بابر اعظم کو دوبارہ قومی ٹیسٹ ٹیم کا کپتان مقرر کرتے ہوئے 16 رکنی اسکواڈ کا اعلان کر دیا ہے۔
اعلان کردہ اسکواڈ میں بابر اعظم (کپتان)، شان مسعود، امام الحق، اذان اویس، عبداللہ فضل، سلمان علی آغا، غازی غوری، محمد رضوان، ساجد خان، علی عثمان، عامر جمال، محمد علی، محمد عباس، عبید شاہ، اویس ظفر اور خرم شہزاد شامل ہیں۔
پی سی بی کے مطابق مڈل آرڈر بیٹر سعود شکیل فٹنس مسائل کے باعث اس دورے کے لیے دستیاب نہیں ہوں گے، اسی وجہ سے انہیں اسکواڈ میں شامل نہیں کیا گیا۔
قومی ٹیم اپنے دورے کا آغاز ویسٹ انڈیز کے خلاف ٹیسٹ سیریز سے کرے گی۔ شیڈول کے مطابق پاکستان ٹیم 18 جولائی کو ٹراوبا میں وارم اپ میچ کھیلے گی، جبکہ ویسٹ انڈیز کے خلاف پہلا ٹیسٹ 25 سے 29 جولائی تک ٹراوبا میں منعقد ہوگا۔
اس موقع پر میڈیا سے گفتگو کرتے ہوئے پاکستان کرکٹ بورڈ کے ڈائریکٹر ہائی پرفارمنس عاقب جاوید نے کہا کہ سلیکشن کمیٹی گزشتہ ڈیڑھ سال سے تینوں فارمیٹس کی کارکردگی کا مسلسل جائزہ لے رہی ہے اور ہر فارمیٹ کے تقاضوں کو مدنظر رکھتے ہوئے فیصلے کیے جاتے ہیں۔
انہوں نے کہا کہ کپتان کی ذمہ داری صرف اپنی کارکردگی تک محدود نہیں ہوتی بلکہ ٹیم کے مجموعی نتائج بھی اہم ہوتے ہیں۔ ان کے مطابق شان مسعود نے بطور بیٹر اچھی کارکردگی دکھائی، تاہم ان کی قیادت میں ٹیم مطلوبہ نتائج حاصل نہ کر سکی، اسی لیے نئی قیادت کے ذریعے ٹیم کی کارکردگی بہتر بنانے کی کوشش کی جا رہی ہے۔
عاقب جاوید نے مزید کہا کہ قومی ٹیم کے فاسٹ بولرز کی رفتار بھی تشویش کا باعث ہے اور اس شعبے میں بہتری کے لیے خصوصی توجہ دی جا رہی ہے۔
سابق کپتان اور قومی سلیکشن کمیٹی کے رکن مصباح الحق نے کہا کہ بین الاقوامی کرکٹ میں کامیابی کے لیے تسلسل بنیادی حیثیت رکھتا ہے۔ ان کے مطابق کسی بھی کھلاڑی یا کپتان کا جائزہ لیتے وقت اس کی مسلسل کارکردگی اور ٹیم پر مثبت اثرات کو مدنظر رکھا جاتا ہے۔
بابر اعظم کی دوبارہ ٹیسٹ قیادت سنبھالنے کے فیصلے کو پاکستانی کرکٹ میں ایک اہم پیش رفت قرار دیا جا رہا ہے، جبکہ شائقین کی نظریں اب ویسٹ انڈیز کے خلاف سیریز میں قومی ٹیم کی کارکردگی پر مرکوز ہوں گی۔
