مالدووا کے وزیراعظم الیگزینڈرو مونٹینو نے اپنے عہدے سے استعفیٰ دینے کا اعلان کرتے ہوئے کہا ہے کہ وہ اپنے اصولوں اور نظریات کے مطابق مزید ذمہ داریاں ادا کرنے کے قابل نہیں رہے، اس لیے انہوں نے منصب چھوڑنے کا فیصلہ کیا۔
چینی خبر رساں ایجنسی شنہوا کے مطابق وزیراعظم الیگزینڈرو مونٹینو نے سماجی رابطے کے پلیٹ فارم ایکس (X) پر جاری اپنے بیان میں کہا کہ آج بطور وزیراعظم ان کی مدتِ کار اختتام پذیر ہو رہی ہے۔
انہوں نے اپنے پیغام میں کہا کہ جب انہیں یہ احساس ہوا کہ وہ اپنے اصولوں، اقدار اور یقین کے مطابق اپنی ذمہ داریاں مزید انجام نہیں دے سکتے تو انہوں نے استعفیٰ دینے کا فیصلہ کیا۔
الیگزینڈرو مونٹینو نے اپنے بیان میں حکومت کے دیگر معاملات یا مستقبل کی سیاسی حکمت عملی پر کوئی تفصیلی تبصرہ نہیں کیا، تاہم ان کے استعفے کو مالدووا کی سیاست میں ایک اہم پیش رفت قرار دیا جا رہا ہے۔
یاد رہے کہ الیگزینڈرو مونٹینو نومبر 2025 میں مالدووا کے وزیراعظم منتخب ہوئے تھے اور اس وقت سے حکومت کی قیادت کر رہے تھے۔
ان کے استعفے کے بعد آئینی طریقۂ کار کے تحت نئی حکومت کی تشکیل اور عبوری انتظامات سے متعلق مشاورت شروع ہونے کا امکان ہے۔
