اسلام آباد: پاکستان اور بھارت نے 2008 کے قونصلر رسائی معاہدے کے تحت قیدیوں کی تازہ ترین فہرستوں کا باقاعدہ تبادلہ کر لیا، جس کے تحت دونوں ممالک نے ایک دوسرے کی تحویل میں موجود اپنے اپنے شہریوں کی معلومات فراہم کیں۔
سفارتی ذرائع کے مطابق پاکستان نے بھارت کو مجموعی طور پر 715 پاکستانی قیدیوں کی فہرست فراہم کی، جن میں 409 سویلین قیدی اور 306 پاکستانی ماہی گیر شامل ہیں۔
ذرائع کا کہنا ہے کہ نئی دہلی میں پاکستانی مشن کے سربراہ سعد وڑائچ نے یہ فہرست بھارتی حکام کے حوالے کی۔
دوسری جانب اسلام آباد میں بھارتی مشن کی سربراہ گیتیکا شریواستو نے بھارت میں موجود پاکستانی اور پاکستان میں موجود بھارتی قیدیوں سے متعلق اپنی حکومت کی فہرست پاکستانی حکام کے حوالے کی۔
سفارتی ذرائع کے مطابق پاکستان اور بھارت کے درمیان قیدیوں کی فہرستوں کا تبادلہ 21 مئی 2008 کو طے پانے والے قونصلر رسائی معاہدے کے تحت ہر سال یکم جنوری اور یکم جولائی کو باقاعدگی سے کیا جاتا ہے۔
اس معاہدے کا مقصد دونوں ممالک کی جیلوں میں موجود شہریوں اور ماہی گیروں کے بارے میں معلومات کا تبادلہ، قونصلر رسائی کو یقینی بنانا اور قانونی کارروائیوں میں شفافیت کو فروغ دینا ہے۔
