اسرائیلی فوج (آئی ڈی ایف) نے دعویٰ کیا ہے کہ جنوبی غزہ میں منگل کو کیے گئے ایک فضائی حملے میں حماس کے عسکری ونگ کے ایک پلاٹون کمانڈر کو شہید کر دیا گیا، جسے اسرائیلی فوج نے اپنی فورسز کے لیے "براہِ راست خطرہ” قرار دیا تھا۔
آئی ڈی ایف کے جاری کردہ بیان کے مطابق ہلاک ہونے والے کمانڈر کی شناخت عادل جہاد محمد عسفور کے نام سے کی گئی ہے، جو حماس کے عسکری ونگ میں پلاٹون کمانڈر کے طور پر خدمات انجام دے رہے تھے۔
اسرائیلی فوج کا کہنا ہے کہ عسفور جنگ کے دوران اسرائیلی فوجیوں پر سنائپر حملوں اور دھماکا خیز مواد (IEDs) کے ذریعے حملوں میں ملوث رہے، جبکہ حالیہ عرصے میں وہ مزید حملوں کی منصوبہ بندی اور حماس کی عسکری صلاحیتوں کی بحالی کے لیے بھی سرگرم تھے۔
بیان میں کہا گیا ہے کہ عادل جہاد محمد عسفور غزہ کی پٹی میں تعینات اسرائیلی فوجیوں کے لیے خطرہ بن چکے تھے، جس کے بعد انہیں ایک فضائی کارروائی میں نشانہ بنایا گیا۔
اسرائیلی فوج نے مزید دعویٰ کیا کہ کارروائی انٹیلی جنس معلومات کی بنیاد پر کی گئی، تاہم حماس کی جانب سے فوری طور پر اس دعوے کی نہ تو تصدیق کی گئی ہے اور نہ ہی تردید۔
غزہ میں جاری جنگ کے دوران اسرائیلی فوج اور حماس کی جانب سے مسلسل ایک دوسرے کے خلاف کارروائیوں اور جوابی حملوں کے دعوے سامنے آ رہے ہیں، جبکہ آزاد ذرائع سے ان دعوؤں کی فوری تصدیق ممکن نہیں ہوتی۔
