سری لنکا اے نے بھارت اے کو دمبولا میں کھیلے گئے ایک سنسنی خیز ون ڈے مقابلے میں سپر اوور میں شکست دے دی، تاہم میچ کے اختتام پر میدان میں کشیدگی نے بھی توجہ حاصل کر لی۔
سوشل میڈیا پر گردش کرنے والی ویڈیوز کے مطابق بھارتی بلے باز سوریا ونشی اور سری لنکن کھلاڑی وشین ہالامباگے کے درمیان تلخ کلامی ہوئی جو بعد ازاں دھکم پیل تک جا پہنچی۔ ویڈیو میں دیکھا جا سکتا ہے کہ سوریا ونشی نے سری لنکن کھلاڑی کو دھکا دیا، جس پر ہالامباگے نے بھی ردعمل دیتے ہوئے خود کو پیچھے ہٹانے کی کوشش کی۔
صورتحال مزید کشیدہ ہونے سے قبل دونوں ٹیموں کے دیگر کھلاڑی اور میچ آفیشلز درمیان میں آگئے اور معاملے کو ٹھنڈا کرایا۔ واقعے کی ویڈیو سامنے آنے کے بعد کرکٹ شائقین اور مبصرین کی جانب سے مختلف ردعمل دیکھنے میں آ رہے ہیں۔
میچ کے دوران بھی بھارتی ٹیم کے رویے پر سوالات اٹھے۔ رپورٹس کے مطابق بھارت اے کے کپتان تلک ورما کئی مواقع پر امپائرز کے فیصلوں پر ناراضی کا اظہار کرتے رہے اور ان کے ساتھ بحث کرتے دکھائی دیے۔
مقابلہ انتہائی سنسنی خیز ثابت ہوا جہاں دونوں ٹیموں کے درمیان فیصلہ سپر اوور تک پہنچا۔ تاہم بھارت اے سپر اوور میں مقررہ 17 رنز کا ہدف حاصل کرنے میں ناکام رہا، جس کے نتیجے میں سری لنکا اے نے یادگار کامیابی اپنے نام کر لی۔
کرکٹ ماہرین کے مطابق نوجوان کھلاڑیوں کے لیے میدان میں نظم و ضبط برقرار رکھنا اتنا ہی اہم ہے جتنا کھیل میں اچھی کارکردگی دکھانا، اور ایسے واقعات کھیل کی روح کے منافی سمجھے جاتے ہیں۔
