وفاقی وزیر داخلہ سید محسن نقوی نے تہران میں اپنے ایرانی ہم منصب اسکندرمومنی سے ملاقات کی، جس میں خطے کی صورتحال، دوطرفہ تعلقات اور جاری امن مذاکرات سے متعلق امور پر تفصیلی تبادلہ خیال کیا گیا۔
رپورٹس کے مطابق پاکستانی وزیر داخلہ اپنے دورۂ ایران کے دوران ایرانی وزیر خارجہ عباس عراقچی سمیت دیگر اعلیٰ حکام سے بھی ملاقاتیں کریں گے۔ ان ملاقاتوں میں خطے کی بدلتی ہوئی صورتحال اور سفارتی کوششوں پر تبادلہ خیال متوقع ہے۔
ایرانی خبر رساں اداروں ارنا اور تسنیم کے مطابق ملاقات کے دوران دونوں رہنماؤں نے باہمی دلچسپی کے مختلف معاملات، سرحدی تعاون اور علاقائی استحکام سے متعلق امور پر بھی گفتگو کی۔
ذرائع کے مطابق پاکستان خطے میں کشیدگی کم کرنے اور جاری تنازعات کے پرامن حل کے لیے سفارتی رابطوں میں سرگرم کردار ادا کر رہا ہے۔ اسی تناظر میں محسن نقوی کا دورۂ تہران اہم قرار دیا جا رہا ہے۔
مبصرین کے مطابق پاکستان کی جانب سے مختلف فریقوں کے درمیان رابطوں اور مذاکراتی عمل کی حمایت خطے میں استحکام کے لیے ایک مثبت پیش رفت سمجھی جا رہی ہے، جبکہ تہران میں ہونے والی ملاقاتیں مستقبل کے سفارتی اقدامات کی راہ ہموار کر سکتی ہیں۔
