پاکستان فٹ بال فیڈریشن اور امریکی سفارتخانہ اسلام آباد کے اشتراک سے اسلام آباد میں فیفا ورلڈ کپ 2026 کے سلسلے میں ایک پروقار تقریب کا انعقاد کیا گیا، جس میں سفارتی، اسپورٹس اور کاروباری شخصیات سمیت 150 سے زائد مہمانوں نے شرکت کی۔
تقریب سے خطاب کرتے ہوئے اسلام آباد میں امریکی ناظم الامور نٹالی بیکر نے کہا کہ فیفا ورلڈ کپ 2026 دنیا بھر کے لوگوں اور قوموں کو قریب لانے کا ایک اہم ذریعہ ثابت ہوگا۔
انہوں نے کہا کہ امریکا، کینیڈا اور میکسیکو مشترکہ طور پر 2026 کے فٹبال ورلڈ کپ کی میزبانی کریں گے، جبکہ 48 ٹیموں کی شرکت کے ساتھ یہ تاریخ کا سب سے بڑا ورلڈ کپ ہوگا۔
نٹالی بیکر کے مطابق یہ عالمی ایونٹ امریکا کی خوبصورتی، ثقافتی تنوع اور کھیلوں سے وابستگی کو دنیا کے سامنے پیش کرنے کا سنہری موقع ہوگا۔ انہوں نے مزید بتایا کہ امریکا 2026 سے 2034 تک مختلف عالمی کھیلوں کی میزبانی کرے گا، جن میں لاس اینجلس اولمپکس 2028 بھی شامل ہیں۔
انہوں نے کہا کہ پاکستان میں پہلی مرتبہ ورلڈ کپ لانچ ایونٹ کا انعقاد خوش آئند ہے، جبکہ سیالکوٹ میں تیار کی جانے والی فٹبالز عالمی معیار کی عکاسی کرتی ہیں۔
امریکی ناظم الامور نے اس بات پر زور دیا کہ کھیل نوجوانوں میں ٹیم ورک، نظم و ضبط اور امید کا جذبہ پیدا کرتے ہیں اور انہیں بڑے خواب دیکھنے اور محنت کرنے کی ترغیب دیتے ہیں۔
اس موقع پر محسن گیلانی نے کہا کہ اگرچہ پاکستان کی ٹیم ورلڈ کپ 2026 کے لیے کوالیفائی نہیں کر سکی، تاہم ملک بھر میں فٹبال شائقین عالمی ایونٹ کے لیے بے حد پرجوش ہیں۔
تقریب کے دوران سیالکوٹ میں تیار کردہ ایک بڑے فٹبال کی رونمائی بھی کی گئی، جو شرکاء کی توجہ کا مرکز بنی۔ اس کے علاوہ پاکستان ویمن فٹبال ٹیم کی دو کھلاڑیوں کو Coca-Cola کی جانب سے اعزازات بھی دیے گئے۔
تقریب کے اختتام پر مہمانوں نے پینلٹی کِک چیلنج میں حصہ لیا جبکہ شرکاء نے کھیلوں کے ذریعے پاکستان اور امریکا کے درمیان تعلقات مزید مضبوط بنانے کے عزم کا اظہار کیا۔
