ناسا اور سپیس ایکس نے بین الاقوامی خلائی اسٹیشن کے لیے نیا تجارتی سپلائی مشن کامیابی سے روانہ کر دیا ہے۔
چینی خبر رساں ادارے شنہوا کے مطابق سپیس ایکس کا ڈریگن خلائی جہاز تقریباً 6 ہزار 500 پاؤنڈ سامان لے کر امریکی ریاست Florida کے کیپ کینیورل اسپیس فورس اسٹیشن سے خلا کی جانب روانہ ہوا۔
ناسا کے مطابق ڈریگن خلائی جہاز اتوار کی صبح خودکار نظام کے تحت عالمی سپیس اسٹیشن سے منسلک ہو جائے گا۔
اس مشن کے ذریعے خلائی اسٹیشن میں موجود عملے کے لیے ضروری سامان، خوراک اور کئی اہم سائنسی تجربات بھی بھیجے جا رہے ہیں۔ ناسا کا کہنا ہے کہ مشن میں شامل جدید آلات زمین کے گرد موجود چارج شدہ ذرات، سیاروں کی تشکیل اور زمین و چاند سے منعکس ہونے والی سورج کی روشنی کے تفصیلی مطالعے میں مدد فراہم کریں گے۔
خلائی ادارے کے مطابق یہ آئی ایس ایس کے لیے سپیس ایکس کا 34واں تجارتی سپلائی مشن ہے۔ مشن کی روانگی خراب موسم کے باعث دو مرتبہ مؤخر کی گئی تھی تاہم بعد ازاں کامیابی کے ساتھ لانچ مکمل کر لیا گیا۔
ماہرین کے مطابق یہ مشن نہ صرف خلائی تحقیق بلکہ مستقبل کے بین السیاراتی مشنز اور جدید سائنسی ٹیکنالوجی کی ترقی میں بھی اہم کردار ادا کرے گا۔
