بیلاروس اور روسی حراست سے پولینڈ اور مالڈووا کے قیدی رہا، ٹرمپ کا شکریہ

امریکی صدر ڈونلڈ ٹرمپ نے اعلان کیا ہے کہ بیلاروس اور روسی حراست میں موجود پولینڈ اور مالڈووا کے پانچ قیدیوں کو رہا کر دیا گیا ہے۔ امریکی صدر نے اس پیش رفت کو سفارتی کامیابی قرار دیتے ہوئے خصوصی ایلچی جان کول کی کوششوں کو سراہا۔

امریکی صدر نے سماجی رابطے کے اپنے پلیٹ فارم پر جاری بیان میں کہا کہ تین پولش اور دو مالڈووی شہریوں کی رہائی ممکن بنائی گئی ہے۔ انہوں نے بیلاروس کے صدر الیگزینڈر لوکاشینکو کا تعاون اور دوستی پر شکریہ بھی ادا کیا۔

بیان میں پولش نژاد بیلاروسی صحافی اور کارکن آندریج پوکزوبٹ کی رہائی کا بھی ذکر کیا گیا، جنہیں بیلاروس میں قید رکھا گیا تھا۔ یاد رہے کہ پولینڈ کے وزیر اعظم ڈونلڈ ٹسک اس سے قبل آندریج پوکزوبٹ کی رہائی کی تصدیق کر چکے ہیں۔

رپورٹس کے مطابق بیلاروس نے گزشتہ دو برسوں کے دوران سیکڑوں قیدیوں کو رہا کیا ہے، جبکہ امریکی صدر ڈونلڈ ٹرمپ کی دوسری مدتِ صدارت میں اس عمل میں تیزی دیکھی گئی ہے۔ اطلاعات ہیں کہ امریکا نے اس کے بدلے بیلاروس پر عائد بعض پابندیوں میں نرمی بھی شروع کر دی ہے۔