لاہور: پاکستان علماء کونسل (پی یو سی) کے چیئرمین حافظ محمد طاہر محمود اشرفی نے کہا ہے کہ سعودی ولی عہد شہزادہ محمد بن سلمان نے ایرانی قیادت کو واضح یقین دہانی کرائی ہے کہ سعودی عرب کی سرزمین ایران کے خلاف کسی بھی کارروائی کے لیے استعمال نہیں ہونے دی جائے گی۔
سوشل میڈیا پلیٹ فارم ایکس (X) پر جاری اپنے بیان میں حافظ طاہر اشرفی نے کہا کہ متعدد حملوں اور خطے میں شدید کشیدگی کے باوجود مملکت سعودی عرب نے صبر، تحمل اور ذمہ داری کا مظاہرہ کیا، جس سے علاقائی امن و استحکام کے لیے اس کے مثبت کردار کا اظہار ہوتا ہے۔
انہوں نے کہا کہ پاکستان اور سعودی عرب نے ہمیشہ اس مؤقف کی حمایت کی ہے کہ ایران اور امریکہ کے درمیان اختلافات اور تنازعات کا حل جنگ یا طاقت کے استعمال کے بجائے مذاکرات، سفارت کاری اور سیاسی ذرائع سے نکالا جانا چاہیے۔
حافظ محمد طاہر محمود اشرفی کے مطابق حالیہ پیش رفت میں پاکستان اور سعودی عرب کی اعلیٰ قیادت، خصوصاً فیلڈ مارشل حافظ سید عاصم منیر اور ولی عہد شہزادہ محمد بن سلمان کے درمیان مسلسل رابطوں اور سفارتی کوششوں کے نتیجے میں امریکی صدر نے ایران پر متوقع حملوں کو روکنے کا فیصلہ کیا۔
انہوں نے مزید کہا کہ پاکستان اور سعودی عرب کی جانب سے خطے میں امن، استحکام اور مذاکرات کے لیے سازگار ماحول پیدا کرنے کی مشترکہ کوششیں قابلِ تحسین ہیں، جنہیں جتنا بھی سراہا جائے کم ہے۔
