برلن حملے کے سائے میں ایمسٹرڈیم ورلڈ پرائیڈ، ہزاروں افراد کینال پریڈ میں شریک

ایمسٹرڈیم: نیدرلینڈز کے دارالحکومت ایمسٹرڈیم میں ورلڈ پرائیڈ کی مرکزی تقریب کینال پریڈ کے موقع پر ہفتے کے روز ہزاروں افراد نے شرکت کی۔ یہ رنگا رنگ تقریب گزشتہ ہفتے برلن پرائیڈ پر ہونے والے مہلک حملے کے پس منظر میں منعقد ہوئی، جس کے باعث سکیورٹی کے غیر معمولی انتظامات کیے گئے۔

ورلڈ پرائیڈ کی مرکزی تقریب میں قوسِ قزح کے جھنڈوں اور غباروں سے سجی درجنوں کشتیاں ایمسٹرڈیم کی تاریخی نہروں میں رواں رہیں، جبکہ رنگ برنگے ملبوسات میں ملبوس شرکاء نے جشن، یکجہتی اور مساوات کے حق میں اپنے جذبات کا اظہار کیا۔

ایمسٹرڈیم کو اس سال ورلڈ پرائیڈ کی میزبانی اس موقع پر دی گئی ہے جب نیدرلینڈز میں دنیا کی پہلی قانونی طور پر تسلیم شدہ ہم جنس شادی کو 25 سال مکمل ہو چکے ہیں۔ دو ہفتوں پر مشتمل تقریبات کا مرکزی موضوع "اتحاد” (Unity) رکھا گیا ہے۔

تقریب میں نیدرلینڈز کے وزیر اعظم راب جیٹن بھی شریک ہوئے، جبکہ پولیس نے سائیکلوں، کشتیوں اور گاڑیوں کے ذریعے شہر بھر میں سخت حفاظتی نگرانی جاری رکھی۔ برلن حملے کے بعد ایمسٹرڈیم کی میئر فیمکے ہلسیما نے اضافی حفاظتی اقدامات کا اعلان کیا تھا، تاہم ان کی تفصیلات ظاہر نہیں کی گئیں۔

یاد رہے کہ گزشتہ ہفتے برلن پرائیڈ کے دوران ایک شخص نے مبینہ طور پر ہجوم پر وین چڑھا دی تھی، جس کے نتیجے میں ایک شخص ہلاک اور 30 سے زائد افراد زخمی ہوئے تھے۔ بعد ازاں جرمن پولیس نے حملہ آور کو گولی مار کر ہلاک کر دیا تھا۔

ایمسٹرڈیم پرائیڈ کے ترجمان مارٹین البرز نے کہا کہ سکیورٹی انتظامات کے باوجود تقریب کا بنیادی مقصد شمولیت، مساوات اور آزادی کا پیغام دینا ہے۔ ان کے بقول دہشت گردی کا مقصد خوف پھیلانا ہوتا ہے، لیکن ایسے حملے لوگوں کو اپنے حقوق کے اظہار سے باز نہیں رکھ سکتے۔

تقریب میں شریک متعدد افراد نے کہا کہ برلن حملے نے انہیں مزید حوصلہ دیا ہے کہ وہ آزادی، مساوات اور انسانی حقوق کے لیے اپنی آواز بلند کریں۔ امریکی نژاد شرکاء ٹری شان گریفن نے کہا کہ اگر کوئی انہیں ڈرانا چاہتا ہے تو وہ اس کے برعکس مزید مضبوطی سے سامنے آئیں گے۔

دوسری جانب 25 سالہ جولیان وان ڈیر ہائیڈ نے کہا کہ برلن کا واقعہ اس بات کی یاد دہانی ہے کہ آج بھی پرائیڈ تقریبات اور مساوی حقوق کی جدوجہد کی ضرورت برقرار ہے۔

برلن حملے کے متاثرین سے اظہارِ یکجہتی کے لیے اس ہفتے ایمسٹرڈیم کے مشہور ہومومونمنٹ پر ہزاروں افراد نے پھول رکھے، جہاں LGBTQ+ برادری کے خلاف تاریخی جبر کے متاثرین کو خراجِ عقیدت پیش کیا گیا۔