راولپنڈی: چیف آف آرمی اسٹاف اور چیف آف ڈیفنس فورسز فیلڈ مارشل سید عاصم منیر، نشانِ امتیاز (ملٹری)، ہلالِ جرات نے کہا ہے کہ سکیورٹی فورسز اور قانون نافذ کرنے والے اداروں کی مسلسل کوششیں، عوام کی غیر متزلزل حمایت کے ساتھ بلوچستان میں دیرپا امن کے قیام کو یقینی بنائیں گی، جبکہ بیرونی حمایت یافتہ عناصر کے مذموم عزائم کو ہر قیمت پر ناکام بنایا جائے گا۔
پاک فوج کے شعبہ تعلقات عامہ (آئی ایس پی آر) کے مطابق فیلڈ مارشل سید عاصم منیر نے جنرل ہیڈکوارٹرز (جی ایچ کیو) راولپنڈی میں 20ویں نیشنل ورکشاپ بلوچستان کے شرکا سے ملاقات اور تبادلہ خیال کیا۔
شرکا سے خطاب کرتے ہوئے انہوں نے کہا کہ پاکستان کی سکیورٹی فورسز اور قانون نافذ کرنے والے ادارے عوام کے تعاون سے بلوچستان میں امن و استحکام کے قیام کے لیے بھرپور عزم کے ساتھ کام کر رہے ہیں۔
انہوں نے اس عزم کا اعادہ کیا کہ فتنہ الخوارج اور فتنہ الہندوستان کے خلاف ہدف پر مبنی کارروائیاں پوری قوت سے جاری رہیں گی اور دہشت گردی کے ساتھ اس کے سہولت کاروں کا بھی ملک سے مکمل خاتمہ کیا جائے گا۔
فیلڈ مارشل عاصم منیر نے کہا کہ جہاں کہیں بھی دہشت گردوں کا بنیادی ڈھانچہ پاکستان اور اس کے عوام کے لیے خطرہ بنے گا، ریاست اسے ختم کرنے کے اپنے عزم پر قائم رہے گی۔
انہوں نے کہا کہ بیرونی سرپرستی میں کام کرنے والے عناصر مسلسل بلوچستان میں تشدد، بدامنی اور عدم استحکام کو فروغ دینے کی کوشش کر رہے ہیں، تاہم پاکستان کی مسلح افواج عوام کے اتحاد، حوصلے اور ثابت قدمی کے ساتھ ان تمام سازشوں کا مضبوط اور فیصلہ کن جواب دے کر ناکام بنائیں گی۔
اپنے خطاب میں انہوں نے بلوچستان کو پاکستان کا فخر قرار دیتے ہوئے کہا کہ یہ صوبہ بے پناہ قدرتی وسائل سے مالا مال ہے، جبکہ یہاں کے باہمت، محنتی اور محب وطن عوام اس کی سب سے بڑی طاقت ہیں۔
انہوں نے کہا کہ وفاقی اور صوبائی حکومتوں کی جانب سے جاری ترقیاتی منصوبوں کا مقصد عوام دوست اور جامع حکمت عملی کے ذریعے بلوچستان کے سماجی اور معاشی منظرنامے میں مثبت تبدیلی لانا ہے۔
چیف آف آرمی اسٹاف نے قومی یکجہتی کے فروغ اور بلوچستان میں پائیدار امن و خوشحالی کے لیے سول سوسائٹی، تعلیمی اداروں، میڈیا اور نوجوانوں کے مثبت کردار کو بھی سراہا اور ملک کے روشن مستقبل کے لیے قومی اتحاد، استقامت اور مشترکہ کوششوں کی ضرورت پر زور دیا۔
نشست کے اختتام پر سوال و جواب کا سیشن بھی منعقد ہوا، جس میں شرکا نے پاکستان کے استحکام، خودمختاری، ترقی اور بلوچستان میں پائیدار امن و خوشحالی کے لیے اپنے مشترکہ عزم کا اعادہ کیا۔
