منیلا: نائب وزیراعظم و وزیر خارجہ سینیٹر محمد اسحاق ڈار نے فلپائن کے دارالحکومت منیلا میں 33ویں آسیان ریجنل فورم (ARF) کے موقع پر سری لنکا کے وزیر خارجہ وجیتھا ہیراتھ سے ملاقات کی، جس میں دونوں ممالک کے درمیان دوطرفہ تعلقات، علاقائی تعاون اور بین الاقوامی امور پر تفصیلی تبادلہ خیال کیا گیا۔
وزارت خارجہ کی جانب سے جاری بیان کے مطابق دونوں وزرائے خارجہ نے پاکستان اور سری لنکا کے درمیان قریبی اور دوستانہ تعلقات کا اعادہ کرتے ہوئے تجارت، اقتصادی روابط، دفاعی تعاون اور عوامی سطح پر روابط کو مزید فروغ دینے کے عزم کا اظہار کیا۔
ملاقات کے دوران ادارہ جاتی روابط میں مثبت پیش رفت، بڑھتے ہوئے اقتصادی و تجارتی تعاون اور پاکستانی کرکٹ ٹیم کے حالیہ کامیاب دورۂ سری لنکا کو بھی سراہا گیا۔ دونوں رہنماؤں نے اس بات پر اتفاق کیا کہ دوطرفہ تعلقات کو مزید مضبوط بنانے کے لیے اعلیٰ سطح کے رابطوں کا تسلسل انتہائی اہم ہے۔
علاقائی اور عالمی صورتحال پر گفتگو کرتے ہوئے سری لنکا کے وزیر خارجہ وجیتھا ہیراتھ نے خطے میں امن، استحکام اور مکالمے کے فروغ کے لیے پاکستان کے تعمیری اور مثبت کردار کو سراہا۔
دونوں رہنماؤں نے اس امید کا اظہار کیا کہ حالیہ علاقائی کشیدگی کو سفارت کاری اور مذاکرات کے ذریعے حل کیا جائے گا، تاکہ خطے میں پائیدار امن، استحکام اور باہمی تعاون کو فروغ مل سکے۔
