بنگلہ دیش میں سابق صدر ضیاء الرحمان کے قتل کے مقدمے میں اہم پیش رفت سامنے آئی ہے، جہاں قانون نافذ کرنے والے اداروں نے دعویٰ کیا ہے کہ قتل میں ملوث ایک اہم ملزم کو 45 سال بعد دارالحکومت ڈھاکہ سے گرفتار کر لیا گیا ہے۔
ڈھاکہ سے ذرائع کے مطابق ڈھاکہ میٹروپولیٹن پولیس (ڈی بی) نے جمعرات کی شام بنانی ڈی او ایچ ایس کے علاقے میں کارروائی کرتے ہوئے میجر (ریٹائرڈ) مظفر حسین کو حراست میں لیا۔
ڈیٹیکٹو برانچ کے ایڈیشنل پولیس کمشنر محمد شفیق الاسلام نے گرفتاری کی تصدیق کرتے ہوئے بتایا کہ ملزم کے خلاف قانونی کارروائی مکمل کرنے کے بعد اسے بنگلہ دیشی فوج کے حوالے کیا جائے گا تاکہ اس کے خلاف کورٹ مارشل کی کارروائی آگے بڑھائی جا سکے۔
قانون نافذ کرنے والے اداروں کے مطابق، میجر (ریٹائرڈ) مظفر حسین پر الزام ہے کہ انہوں نے 30 مئی 1981 کو چٹاگانگ کے سرکٹ ہاؤس میں اس وقت کے صدر ضیاء الرحمان کو شناخت کرنے کے بعد ان پر براہِ راست فائرنگ کی تھی۔
تحقیقاتی ذرائع کے مطابق قتل کے بعد ملزم ملک سے فرار ہوگیا تھا اور اس کی گرفتاری پر انعام بھی مقرر کیا گیا تھا۔ حکام کا دعویٰ ہے کہ وہ طویل عرصے تک بھارت میں روپوش رہا اور بعد ازاں مختلف فرضی ناموں سے سرحد پار کر کے بنگلہ دیش آتا جاتا رہا۔
ضیاء الرحمان بنگلہ دیش کے چھٹے صدر، سابق آرمی چیف اور 1971 کی جنگِ آزادی کے نمایاں رہنماؤں میں شمار کیے جاتے ہیں۔ انہیں “بیر اُتم” کے اعلیٰ فوجی اعزاز سے بھی نوازا گیا تھا۔
انہوں نے یکم ستمبر 1978 کو بنگلہ دیش نیشنلسٹ پارٹی (BNP) کی بنیاد رکھی، جو بعد ازاں ملک کی بڑی سیاسی جماعتوں میں شامل ہوئی۔
30 مئی 1981 کو چٹاگانگ کے دورے کے دوران سرکٹ ہاؤس میں فوجی افسران کے ایک گروپ نے ان پر حملہ کیا، جس میں وہ جاں بحق ہو گئے تھے۔ ان کی میت تین روز بعد ڈھاکہ منتقل کی گئی، جہاں لاکھوں افراد نے نمازِ جنازہ میں شرکت کی۔ بعد ازاں انہیں ڈھاکہ میں ضیاء اُدیان میں سپردِ خاک کیا گیا۔
