تہران: ایران کے وزیر خارجہ عباس عراقچی نے دارالحکومت تہران میں فلسطینی مزاحمتی تنظیم حماس اور لبنانی تنظیم حزب اللّٰہ کے اعلیٰ سطحی وفود سے الگ الگ ملاقاتیں کیں، جن میں خطے کی موجودہ سیکیورٹی صورتحال، اسرائیل کے ساتھ جاری کشیدگی اور باہمی تعاون کے مختلف امور پر تفصیلی تبادلہ خیال کیا گیا۔
عرب میڈیا رپورٹس کے مطابق ایرانی وزیر خارجہ نے ملاقات کے دوران اس بات کا اعادہ کیا کہ ایران اسرائیلی جارحیت کے خلاف مزاحمتی قوتوں کی سیاسی اور سفارتی حمایت جاری رکھے گا اور خطے میں استحکام کے لیے اپنے مؤقف پر قائم رہے گا۔
حزب اللّٰہ کے وفد سے گفتگو کرتے ہوئے عباس عراقچی نے کہا کہ ایران اور لبنان کے درمیان طے پانے والی مفاہمتی یادداشت کی روشنی میں لبنان میں جنگ کے خاتمے اور کشیدگی میں کمی کے لیے سفارتی کوششیں جاری رکھی جائیں گی۔ انہوں نے اس بات پر زور دیا کہ علاقائی امن و استحکام کے لیے سیاسی حل اور سفارتی رابطوں کو فروغ دینا ضروری ہے۔
ذرائع کے مطابق ملاقاتوں میں مشرق وسطیٰ کی تازہ صورتحال، اسرائیل کے ساتھ جاری تنازعات، علاقائی سلامتی اور مختلف سیاسی و سفارتی معاملات پر بھی تبادلہ خیال کیا گیا۔
ایرانی وزیر خارجہ نے اس موقع پر اس عزم کا اظہار کیا کہ ایران اپنے علاقائی اتحادیوں کے ساتھ رابطے برقرار رکھتے ہوئے موجودہ بحرانوں کے حل کے لیے سفارتی اقدامات جاری رکھے گا۔
یہ ملاقات ایسے وقت میں ہوئی ہے جب مشرق وسطیٰ میں کشیدگی بدستور برقرار ہے اور مختلف علاقائی قوتیں جنگ بندی، سفارتی مذاکرات اور خطے میں استحکام کے لیے سرگرم ہیں۔
