لندن: برطانیہ کے شاہ چارلس نے ملکی تاریخ میں پہلی مرتبہ اپنی ٹیکس ادائیگیوں کی تفصیلات عوام کے سامنے جاری کر دی ہیں، جس کے بعد وہ ٹیکس کی معلومات رضاکارانہ طور پر شائع کرنے والے پہلے برطانوی بادشاہ بن گئے ہیں۔
برطانوی میڈیا کے مطابق شاہ چارلس نے گزشتہ مالی سال کے دوران مجموعی طور پر 12.9 ملین پاؤنڈ ٹیکس ادا کیا، جبکہ شہزادہ ولیم نے اسی عرصے میں 7.76 ملین پاؤنڈ ٹیکس کی مد میں قومی خزانے میں جمع کرائے۔
رپورٹس کے مطابق شاہ چارلس کو رواں مالی سال کے دوران شاہی جاگیر (Royal Estate) سے 25.2 ملین پاؤنڈ آمدنی حاصل ہوئی، جس کے باعث وہ برطانیہ کے سب سے زیادہ ٹیکس ادا کرنے والے سو افراد میں شامل ہو گئے ہیں۔
بکنگھم پیلس نے بتایا کہ شاہ چارلس اور شہزادہ ولیم نے اپنی ٹیکس تفصیلات رضاکارانہ طور پر جاری کرنے کا فیصلہ ذاتی خواہش اور عوامی اعتماد کو مزید مضبوط بنانے کے مقصد سے کیا۔
شاہی محل کے مطابق اس اقدام کا بنیادی مقصد شاہی خاندان کے مالی معاملات میں شفافیت کو فروغ دینا، احتساب کے عمل کو مضبوط بنانا اور عوام کو یہ اعتماد دینا ہے کہ شاہی ادارہ بھی مالی ذمہ داریوں کی ادائیگی میں کھلے پن کی پالیسی پر عمل پیرا ہے۔
مبصرین کے مطابق شاہ چارلس کا یہ فیصلہ برطانوی بادشاہت میں جدید طرز حکمرانی، عوامی اعتماد اور شفافیت کے فروغ کی جانب ایک اہم قدم تصور کیا جا رہا ہے، جس سے مستقبل میں شاہی مالی معاملات کے حوالے سے مزید معلومات عوام کے سامنے لائے جانے کی راہ بھی ہموار ہو سکتی ہے۔
