واشنگٹن: وائٹ ہاؤس نے تصدیق کی ہے کہ ایران کی فٹ بال ٹیم کو آئندہ فیفا ورلڈ کپ میں شرکت کے لیے امریکا کے ویزے جاری کر دیے گئے ہیں۔
برطانوی خبر رساں ادارے سے گفتگو کرتے ہوئے وائٹ ہاؤس حکام نے بتایا کہ ایرانی ٹیم کے کھلاڑیوں اور آفیشلز کو ورلڈ کپ میچز میں شرکت کے لیے ضروری سفری اجازت نامے فراہم کر دیے گئے ہیں، جس کے بعد ان کی امریکا آمد ممکن ہو سکے گی۔
یہ فیصلہ ایسے وقت میں سامنے آیا ہے جب عالمی سطح پر کھیلوں کے بڑے مقابلوں میں سیاسی کشیدگی کے باوجود ٹیموں کی شرکت کو یقینی بنانے کے لیے سفارتی اقدامات کیے جا رہے ہیں۔
رپورٹ کے مطابق ایرانی قومی فٹ بال ٹیم ورلڈ کپ میں اپنے گروپ جی کے میچز امریکا میں کھیلے گی۔ ٹیم اپنا پہلا میچ 15 جون کو نیوزی لینڈ کے خلاف لاس اینجلس میں کھیلے گی۔
اسی مقام پر ایران اور بیلجیئم کی ٹیم کے درمیان بھی گروپ میچ شیڈول ہے، جبکہ ایک اور میچ سیاٹل میں مصر کے خلاف کھیلا جائے گا۔
حکام کے مطابق ویزوں کی منظوری کا مقصد کھیلوں کے عالمی مقابلوں کو سیاست سے الگ رکھنا اور تمام شریک ٹیموں کو مساوی مواقع فراہم کرنا ہے۔
